Chehııada 4 jasar baladan maımyl sheshegi anyqtaldy

NUR-SULTAN. QazAqparat – Chehııada kishkentaı sábıdiń maımyl sheshegi vırýsyn juqtyrǵany anyqtaldy, dep habarlaıdy QazAqparat QR DSM Sanıtarııalyq-epıdemıologııalyq baqylaý komıtetiniń Telegram kanalyna silteme jasap.

Pragadaǵy balabaqshalardyń birine kelgen 4 jasar balanyń aýratyny belgili boldy. Ol vırýsty Ispanııada juqtyrǵan bolýy múmkin, onda ata-anasy jazǵy demalysyn ótkizgen.

Chehııada anyqtalǵan maımyl sheshegin juqtyrǵan aýrýlar 66-ǵa jetti. Naýqastardyń eń kóbi Pragada - 52. Dárigerler respýblıkada ınfektsııanyń alǵashqy jaǵdaıy týraly 24 mamyrda habarlady.

Ýkraınada maımyl sheshegin juqtyrýdyń alǵashqy jaǵdaıy zerthana jaǵdaıynda rastaldy.

«15 qyrkúıekte Ýkraınada maımyl shesheginiń alǵashqy jaǵdaıy zerthanalyq túrde rastaldy. Qazirgi ýaqytta naýqas statsıonarlyq emdeý úshin medıtsınalyq mekemege jatqyzyldy, aýrý jeńil ótip jatyr», - delingen eldiń Densaýlyq saqtaý mınıstrliginiń Telegram kanalynda.

Anyqtalǵandaı, PTR-zertteýdiń arqasynda aýrýdy dıagnostıkalaý múmkin boldy, qazir epıdemıologııalyq tergeý júrip jatyr.

Naýqastyń aıtýynsha, ol maımyl sheshegin juqtyrǵan adammen baılanyspaǵan jáne shetelge shyqpaǵan.

«Degenmen, aýrý belgileriniń paıda bolýy jáne epıdemıologııalyq anamnezdi jınaýdyń aldyn - ala nátıjeleri patsıenttiń eldiń iri qalalarynyń birinde juqtyrǵanyn kórsetedi», - dep habarlady vedomstvo.

Foto: tass.ru