Chehııada 32 adam A gepatıtinen kóz jumdy

ASTANA. KAZINFORM — Chehııada A gepatıtin juqtyrǵan 32 adam kóz jumdy. Sondaı-aq 3 myńnan astam vırýsty juqtyrý jaǵdaıy tirkeldi, dep habarlaıdy BILD.

Degenmen, indet áli sharyqtaý shegine jetken joq.

Bılik ókilderiniń aıtýynsha, vırýs kóktemde qańǵybastar men nashaqorlar arasynda taraı bastaǵanymen, aqyrynda barlyq áleýmettik toptarǵa jaıyldy. Qazir ınfektsııa rojdestvolyq bazarlarǵa jetti. Germanııa shekarasyna jaqyn Bojı Dar qalasynda bılik úsh apta buryn jeke gıgıenalyq eskertý jasady.

Praga jármeńkelerinde satýshylar qolǵap kıip, dúńgirshekterin únemi dezınfektsııalaıdy. Alaıda kelýshilerdiń kópshiligi dezınfektsııalaý quraldaryn elemeıtindikten, syrqat azaımaı tur.

Chehııa medıtsınalyq palatasynyń prezıdenti Mılan Koýbek qazirgi kezdegi A gepatıti 1979 jyldan bergi eń iri indet ekenin aıtty.

Osyǵan deıin AQSh-ta gepatıt, gerpes, COVID-19 juqtyrǵan zerthanalyq maımyl qashyp ketkeni týraly jazdyq.