Chehııada 250 myń adam mıtıngke shyqty
NUR-SULTAN. QazAqparat - Chehııalyqtar premer-mınıstr Andreıa Babıshtiń otstavkaǵa ketýin talap etip mıtıngke shyqty. Uıymdastyrýshylardyń aıtýynsha, ereýilge shyqqandardyń sany 250 myńǵa jetedi. Bul týraly QazAqparat VVS silteme jasap habarlaıdy.
Praganyń Letna saıabaǵyna jınalǵandar el premer-mınıstri Andreı Babıshtiń laýazymnan ketýin talap etti. BAQ-ta taraǵan habarlarǵa qaraǵanda mıtıngke qatysýshylardyń arasynda ońshyl saıası partııalar basshylary men ókilderi, parlamenttegi oppozıtsııalyq fraktsııalardyń depýtattary, qoǵam jáne mádenıet qaıratkerleri, qaladaǵy JOO stýdentteri bar.
VVS-tiń habarlaýynsha, mıtıngke tek astana turǵyndary ǵana emes, eldiń túkpir-túkpirinen kelgender de qatysqan.
Ereýilge shyqqandar Babıshti sybaılas jemqorlyqqa qatysy bar dep aıyptap otyr. Burynǵy kommýnıst Andreı Babısh - Chehııadaǵy eń baı azamattardyń tiziminde ekinshi orynda. Narazylar Babıshti Eýroodaq bergen sýbsıdııalardy jymqyrdy, alaıaqtyq jasady dep aıyptaıdy.
Buǵan deıin 400 myń adam onyń laýazymnan ketýin talap etip petıtsııaǵa qol qoıǵan.
2018 jylǵy qarashada Chehııa parlamentiniń tómengi palatasy Andreı Babısh úkimetine senimsizdik votýmyn engizbek bolǵan edi, biraq osy áreketterlen eshteńe ózgergen joq.
Aıta ketsek, tarıhtaǵy eń aýqymdy antıkommýnıstik aktsııa dál osy Pragadaǵy Letna saıabaǵynda 1989 jyly ótken. Sol kezde oǵan jarty mıllıonǵa jýyq adam qatysqan.
