Chehııa turǵyndardy eskertý júıesin jańartady

ASTANA. KAZINFORM — Chehııada turǵyndardy tótenshe jaǵdaılar kezinde jedel eskertýge arnalǵan jańa júıe engiziledi, dep jazady AZERTADJ.

Bul júıe Cell Broadcast dep atalady. Ol zamanaýı tehnologııalarǵa negizdelgen.

Chehııa úkimeti qarastyryp jatqan bul jobaǵa shamamen 4 mıllıon eýro jumsalady. Sonymen qatar, uıaly baılanys operatorlary bul júıege QQS-ty qosa eseptegende 5,4 mıllıon eýro kóleminde qarjy salýǵa mindetteledi. Júıeni jyl saıynǵy paıdalaný shyǵyndary shamamen 2 mıllıon eýrony quraıdy, dep málimdedi ČTK — Chehııanyń ulttyq aqparat agenttigi.

Úkimet bul júıeni engizý qajettigin 2023 jylǵy 21 jeltoqsanda Pragadaǵy Karl ýnıversıtetinde bolǵan qaıǵyly jaǵdaıdan keıin kóterdi. Atys kezinde fılosofııa fakýltetiniń 14 stýdenti men oqytýshysy qaza tapty. Al qylmysker — ýnıversıtettiń stýdenti keıin ózin-ózi atyp óltirdi. Bul oqıǵa Chehııa tarıhyndaǵy eń iri qandy qyrǵyn retinde tirkeldi.

Sondaı-aq, Chehııadaǵy ótken jylǵy sý tasqyndary kezinde oryn alǵan jaǵdaılar da eski júıeniń kemshilikterin aıqyn kórsetti. Atap aıtqanda, eskertý habarlamalary azamattarǵa birneshe ondaǵan mınýt keshigip jetken, saldarynan bul shuǵyl áreket etýge keri áserin tıgizgen.

Jańa Cell Broadcast júıesi mobıldi qurylǵylar arqyly naqty ýaqyt rejıminde habar taratyp, eskertý aqparatyn jyldam jetkizýge múmkindik beredi.

Buǵan deıin Chehııada 3-4 qazanda parlamenttik saılaý ótetini habarlandy.