Chehııa prezıdenti aýrýhanaǵa jatqyzyldy
PRAGA. QazAqparat – Chehııa prezıdenti Mılosh Zeman búgin, seısenbide Praganyń Ortalyq áskerı aýrýhanaǵa jatqyzyldy, dep habarlaıdy QazAqparat Pravo gazetine silteme jasap.
Zeman aýrýhanaǵa jergilikti ýaqyt boıynsha 11:00-den keıin jetkizildi. Oǵan jubaıy Ivana da keldi. Gazettiń habarlaýynsha, prezıdent aýrýhanada uzaq jatýy múmkin.
76 jastaǵy Zeman aıaqtyń neıropatııasynan zardap shegedi. Osy aýrýdyń saldarynan ol jaqynda múgedekter arbasyna kóshti. Prezıdent estý qabiletiniń nasharlaǵanyna jáne qan qysymynyń tómendegenine shaǵymdanýda. Sonymen qatar, ol buryn qant dıabeti boıynsha dárigerlerdiń baqylaýynda bolǵan.
Pragadaǵy Ortalyq áskerı aýrýhanada ótken demalys kúnderinen bastap Chehııanyń burynǵy prezıdenti Vatslav Klaýs ta jatyr. Ol qan qysymynyń kúrt kóterilýine baılanysty aýrýhanaǵa túsken.
