Chehııa oppozıtsııasynyń úkimetke senimsizdik votýmyn bildirý áreketi sátsiz aıaqtaldy
ASTANA. KAZINFORM – Cheh oppozıtsııasynyń Petr Fıala úkimetine senimsizdik bildirý týraly tórtinshi áreketi taǵy da sátsiz aıaqtaldy. Bul joly ol Ádilet mınıstrliginiń burynǵy basshysy Pavel Blajekke qatysty bıtkoın daýyna baılanysty boldy, dep habarlaıdy DW aqparat agenttigi.
Chehııa premer-mınıstri Petr Fıalanyń úkimeti oǵan senimsizdik bildirýdiń tórtinshi áreketin bastan ótkerdi, dep habarlaıdy ČTK.
Bul joly cheh oppozıtsııasy bastaǵan senimsizdik votýmy Fıalanyń seriktesi jáne burynǵy ádilet mınıstri Pavel Blajek tóńiregindegi krıptovalıýtalyq janjalmen baılanysty boldy. Pragada oppozıtsııalyq partııalardyń 94 depýtaty úkimetti otstavkaǵa jiberý úshin daýys berdi.
Alaıda 200 oryndyq parlamenttiń tómengi palatasynda qajetti 101 daýystyń kópshiligine taǵy da qol jetkizilgen joq. Qazirgi koalıtsııanyń 98 depýtaty úkimetti qoldap daýys berdi.
Atap ótilgendeı, burynǵy premer Andreı Babıshtiń ANO partııasy, sondaı-aq ótken jyldan beri oppozıtsııada bolǵan ásire ońshyl SPD jáne «Qaraqshylar partııasy» úkimettiń otstavkaǵa ketýine «jaqtap» daýys berdi. Senimsizdik votýmy týraly usynys aldynda Chehııa parlamentinde 34 saǵatqa jýyq talqylaý ótti.
Senimsizdik votýmyna Chehııanyń Ádilet mınıstrligi kúmándi krıptovalıýtalyq bıtkoındi shamamen bir mıllıard cheh kronyn (shamamen 40 mln eýro) satqannan keıin týyndaǵan «bıtkoın janjaly» sebep boldy, dep jazdy ČTK ótken aptada. Osy janjalǵa baılanysty mınıstrlik basshysy Pavel Blajek otstavkaǵa ketti. Oppozıtsııa sonymen qatar qarjy mınıstri Zbınek Stanıýranyń otstavkaǵa ketýin talap etip otyr. Materıalda atap ótilgendeı, 18 maýsymdaǵy jıyn ANO partııasynyń bastamasymen shaqyrylǵan.
Chehııa oppozıtsııasynyń málimetinshe, krıptovalıýtadaǵy somany Ádilet mınıstrligine buryn qarjy jymqyrý, esirtki saýdasy jáne zańsyz qarý saqtaǵany úshin sottalǵan kásipker Tomash Jırıkovskıı aýdarǵan. Jańa ádilet mınıstri Eva Dekrýa aýdıt júrgizip, tekserý qorytyndylaryn tamyz aıynyń sońyna deıin, ıaǵnı qazan aıynda Chehııada ótetin parlamenttik saılaý aldynda jarııalaýdy josparlap otyr, dep jazdy ČTK.
Buǵan deıin Mońǵolııa parlamenti «El premer-mınıstrine senim votýmy týraly» qaýlynyń qabyldanýyn qoldamaǵanyn habarlaǵan bolatynbyz.