Chehııa mınıstri «Tsıfrlyq Jibek jolyn» damytýdyń úsh basym baǵytyn atady
ASTANA. KAZINFORM — Azııa men Eýropa arasyndaǵy júk tasymalyn jedeldetip, kólik dálizderiniń tıimdiligin arttyrý úshin tsıfrlyq tehnologııalardy keńinen qoldaný qajet. Chehııanyń Kólik mınıstri Ivan Bednarık Astanada ótip jatqan New Silk Way halyqaralyq forýmynda osy baǵyttaǵy úsh negizgi basymdyq týraly aıtty.
Onyń aıtýynsha, «Tsıfrlyq Jibek jolyn» damytý úshin eń aldymen naqty nátıjege baǵyttalǵan jobalardy júzege asyrý qajet.
— Qazir úsh basym baǵytqa nazar aýdarylý kerek. Birinshiden, shekaraaralyq júk tasymalynyń barlyq kezeńin qamtıtyn, keıin aýqymyn keńeıtýge bolatyn birneshe pılottyq jobany iske asyrý qajet. Ekinshiden, ortaq standarttarǵa negizdelgen qaýipsiz ári ózara úılesimdi derekter almasý júıesin qalyptastyrý mańyzdy. Úshinshiden, memlekettik organdar, ınfraqurylym operatorlary, tasymaldaýshylar, logıstıkalyq kompanııalar, tehnologııa jetkizýshileri men qarjy ınstıtýttary jumystyń bastapqy kezeńinen-aq birlesip áreket etýi tıis, — dedi Chehııa ókili.
Onyń sózinshe, jasandy ıntellektini kólik salasyna jańa tehnologııa bolǵany úshin ǵana engizýdiń qajeti joq. Ol tasymaldaýshylardyń, kásipkerlerdiń jáne azamattardyń kúndelikti máselelerin sheshýge kómektesýi tıis.
Sondaı-aq Chehııa ókili júk tasymalynyń barlyq kezeńin qamtıtyn biryńǵaı logıstıkalyq júıe qurý mańyzdy ekenin jetkizdi. Mundaı júıe tasymal tıimdiligin arttyryp, kólik dálizderiniń turaqty jumys isteýine múmkindik beredi.
— Chehııa osy baǵyttaǵy halyqaralyq yntymaqtastyqqa belsendi ári senimdi seriktes retinde qatysýǵa daıyn, — dedi Ivan Bednarık.
Eske salaıyq, elordada Qazaqstannyń Kólik aptalyǵy aıasynda «NEW SILK WAY» VIII halyqaralyq bıznes-forýmy ótip jatyr. Atalǵan is-shara — kólik-logıstıka salasyn damytýdyń ózekti máselelerin talqylaýǵa, halyqaralyq yntymaqtastyqty nyǵaıtýǵa jáne Eýrazııanyń kólik dálizderiniń tıimdiligin arttyrýǵa arnalǵan negizgi halyqaralyq alańdardyń biri.
Bıyl forým Qazaqstan men 39 ózge memleketterden kelgen ókilderdiń basyn qosty. Іs-sharaǵa memlekettik organdardyń, halyqaralyq uıymdardyń, kólik-logıstıkalyq kompanııalardyń, salalyq birlestikter men sarapshylar qaýymdastyǵynyń 2 000-ǵa jýyq ókili qatysady dep kútilýde. Qatysýshylar qatarynda 338 uıymnyń ókilderi bar.
Buǵan deıin atalǵan forýmǵa qatysqan EAEO ókili endigi mindet tsıfrlyq Jibek jolyn qurý ekenin aıtqan edi.
