Chehııa mınıstri qazan aıynda kásipkerler delegatsııasymen Qazaqstanǵa keledi
ASTANA. KAZINFORM – Qazaqstan Respýblıkasynyń Chehııadaǵy Elshisi Qaırat Ábdirahmanov Chehııanyń Kólik mınıstri Ivan Bednarıkpen kezdesti, dep habarlaıdy QR Syrtqy ister mınıstrliginiń baspasóz qyzmeti.
Kezdesý barysynda taraptar Chehııa Premer-mınıstri Andreı Babıshtiń Qazaqstanǵa jýyrdaǵy resmı saparynyń qorytyndysy boıynsha qol jetkizilgen ýaǵdalastyqtardy iske asyrý máselelerin talqylady.
Taraptar kólik pen logıstıka eki el arasyndaǵy yntymaqtastyqtyń basym baǵyttarynyń biri ekenin atap ótti.
Qazaqstan men Chehııa teńizge tikeleı shyǵatyn joly joq memleketter bolǵandyqtan, kólik baılanysyn damytý ornyqty ekonomıkalyq ósýdiń mańyzdy tetigi ekeni aıtyldy.
Sondaı-aq halyqaralyq kólik-logıstıkalyq dálizderdiń tıimdiligi men qaýipsizdigin qamtamasyz etýdiń mańyzy artyp kele jatqanyna nazar aýdaryldy.
Taraptar halyqaralyq kólik baǵyttarynyń qaýipsizdigin saqtaý jáne sala qyzmetkerleriniń qaýipsizdigin qamtamasyz etý halyqaralyq qoǵamdastyqtyń ortaq mindeti degen pikirge keldi.
Kelissózderdiń negizgi taqyryptarynyń biri Transkaspıı halyqaralyq kólik baǵytyn, ıaǵnı Orta dálizdi damytý boldy.
Taraptar bul baǵyttyń Eýropa men Azııany jalǵaıtyn strategııalyq kólik dálizine aınalyp kele jatqanyn atap ótti.
Sonymen qatar Orta dálizdiń mańyzy Qazaqstan men Eýropalyq odaq arasyndaǵy joǵary deńgeıdegi kezdesýlerdiń qorytyndylarynda da kórinis tapqany aıtyldy.
Kezdesýde kólik ınfraqurylymyn damytý, logıstıkalyq úderisterdi tsıfrlandyrý, temirjol jelisin jańǵyrtý jáne Kaspıı teńizi porttarynyń ótkizý qabiletin arttyrý máseleleri talqylandy.
Taraptardyń pikirinshe, bul sharalar halyqaralyq bıznes úshin jańa múmkindikter ashyp, cheh jáne eýropalyq kompanııalardyń ınfraqurylymdyq jobalarǵa belsendi qatysýyna jol ashady.
Qaırat Ábdirahmanov cheh tarapyn Qazaqstanda 2026 jylǵy 1 shildeden bastap kúshine engen jańa Konstıtýtsııaǵa sáıkes 23 tamyzda ótetin Quryltaı saılaýyna daıyndyq barysymen tanystyrdy.
Kezdesý barysynda kedendik, kólik-logıstıkalyq jáne kommertsııalyq servısterdi bir júıege biriktiretin Smart Cargo tsıfrlyq platformasyn iske asyrý máselesi de qaraldy.
Taraptar mýltımodaldy júk tasymalyn damytý, zamanaýı logıstıkalyq ortalyqtar qurý, kólik tehnıkasyn jergiliktendirý jáne azamattyq avıatsııa salasyndaǵy yntymaqtastyqty keńeıtý jaıyn da talqylady.
Ivan Bednarık Qazaqstanmen praktıkalyq yntymaqtastyqty odan ári damytýǵa múddeli ekenin jetkizdi.
Ol Transkaspıı halyqaralyq kólik baǵytynyń Eýropa men Ortalyq Azııa arasyndaǵy kólik qatynasyn nyǵaıtýdaǵy róli artyp kele jatqanyn atap ótti.
Mınıstr cheh kompanııalarynyń ınfraqurylymdyq jáne tehnologııalyq jobalarǵa qatysý áleýetine joǵary baǵa berdi.
Sondaı-aq ol bıylǵy qazan aıynda kásipkerler men ǵylymı qaýymdastyq ókilderinen quralǵan delegatsııany bastap Qazaqstanǵa kelýdi josparlap otyrǵanyn málimdedi.
Kezdesýde kólik salasyna maman daıarlaý jáne ǵylymı-tehnıkalyq yntymaqtastyq máseleleri de sóz boldy.
Taraptar eki eldiń joǵary oqý oryndary men ǵylymı-zertteý ortalyqtary arasyndaǵy baılanysty keńeıtýge, birlesken ǵylymı jobalardy júzege asyrýǵa jáne ıntellektýaldy kólik júıeleri, tsıfrlandyrý men jasandy ıntellekt salasyndaǵy ozyq tehnologııalarmen almasýǵa mol múmkindik bar ekenin atap ótti.
Qazaqstan tarapynyń bastamasymen halyqaralyq uıymdar aıasyndaǵy eki eldiń ózara is-qımyly da talqylandy.
Kezdesý qorytyndysynda taraptar kólik jáne logıstıka salasyndaǵy qazaq-cheh seriktestigin odan ári nyǵaıtýǵa nıetti ekenin rastady.
Olar ózara saýda men ınvestıtsııalyq yntymaqtastyqty keńeıtýge, sondaı-aq Ortalyq Azııa men Eýropa arasyndaǵy kólik baılanysyn damytýǵa baǵyttalǵan birlesken jobalardy iske asyrý jumysyn jalǵastyrýǵa daıyn ekenin málimdedi.
Osyǵan deıin Chehııa bıznesi Qazaqstanǵa nege qyzyǵyp otyrǵany týraly jazdyq.
