Chehııa men Qazaqstan iskerlik keńes qurý jóninde memorandýmǵa qol qoıdy
ASTANA. QazAqparat - Chehııa astanasy Praga qalasynda QR IDM vıtse-mınıstri Erlan Haırov pen Chehııa Respýblıkasynyń Ónerkásip jáne saýda mınıstriniń orynbasary Iırjı Kolıba myrzanyń qatysýymen eki eldiń bıznes-forýmy ótti.
Bul týraly QR IDM baspasóz qyzmeti habarlaıdy.
Forýmǵa 100-den astam cheh jáne qazaqstandyq bıznes ókilderi qatysty. Bıznes-forým aıasynda Qazaqstannyń ınvestıtsııalyq tartymdylyǵy, ónerkásip, saqtandyrý jáne saýda salalary talqylandy.
QR Investıtsııalar jáne damý vıtse-mınıstri Erlan Haırov atap ótkendeı, Qazaqstanda qolaıly ınvestıtsııalyq ahýal ornaǵan. Ekijaqty yntymaqtastyqty damytýdyń perspektıvti salalaryna negizinen kólik tasymaly, ınjenerlik, energetıkalyq, ınnovatsııalyq salalar jáne de aýyl sharýashylyǵy kiredi.
Chehııanyń ónerkásip jáne saýda mınıstriniń orynbasary Iırjı Kolıbanyń aıtýynsha, Qazaqstan men Chehııa arasyndaǵy 9 aıdaǵy saýda aınalymynyń kórsetkishi 500 mln. AQSh dollaryn qurap, 121%-ǵa ósken.
Odan bólek, Qazaqstan Respýblıkasynyń syrtqy saýda palatasy men TMD elderiniń saýda-ónerkásiptik palatalary arasyndaǵy ózara túsinistikti arttyrý negizinde Chehııa Respýblıkasy men Qazaqstan Respýblıkasy arasynda iskerlik keńes qurý jónindegi memorandýmǵa qol qoıyldy.
Bul memorandým qolda bar kommertsııalyq kelisimderdi, sondaı-aq eki el arasyndaǵy perspektıvalyq baǵyttardy júzege asyrýǵa múmkindik beredi.
