Chehııa mashına jasaý kontsernderi Qazaqstanmen yntymaqtastyqqa qyzyǵýshylyq bildiredi
ASTANA. QazAqparat - Chehııanyń Ostrava qalasynda «Eýrazııalyq ekonomıkalyq odaq elderimen syrtqy ekonomıkalyq baılanys» atty taqyryptaǵy halyqaralyq konferentsııa ótti. Oǵan Qazaqstannyń Chehııadaǵy Elshisi Serjan Ábdikárimov, Májilis depýtaty, Qazaqstan mashına jasaýshylar odaǵynyń tóraǵasy Meıram Pishembaev qatysty. Bul týraly SІM baspasóz qyzmetinen habarlandy.
Jıyn barysynda sóz sóılegen Elshi EAEO elderine tóraǵalyq etýshi retindegi Qazaqstannyń qyzmeti jaıynda baıandady. Sonymen qatar, S. Ábdikárimov Eýrazııalyq ekonomıkalyq odaqtyń úshinshi eldermen jáne Eýropa odaǵy sekildi negizgi ıntegratsııalyq birlestiktermen ekonomıkalyq qatynastardy tereńdetý týraly QR Prezıdenti N. Nazarbaevtyń bastamalary týraly aıtyp berdi.
Al Májilis depýtaty Meıram Pishembaev iri cheh bıznesi ókilderiniń aldynda Qazaqstannyń mashına jasaý salasyn damytý perspektıvalary týraly baıandama jasap, elimizdegi bıznes júrgizý sharttary, ınvestıtsııalyq klımat pen Qazaqstannyń ónerkásiptik-ekonomıkalyq áleýetin sóz etti. Sonymen qatar, ol Chehııa isker toptaryn Qazaqstanmen belsendi yntymaqtastyqqa shaqyryp, «Nurly jol» baǵdarlamasyn júzege asyrý aıasynda «noý-haý» men jańa tehnologııalar tartýǵa elimizdiń múddeli bolyp otyrǵanyn jetkizdi. «Biz Chehııa tarapyn 2017 jyly Astanada ótetin «EKSPO-2017» halyqaralyq mamandandyrylǵan kórmesine belsendi túrde qatysady dep senemiz. Sonymen qatar, chehııa mashına jasaý kontsernderin 2016 jyldyń 16 qyrkúıeginde Astanada ótetin Qazaqstannyń mashına jasaýshylar forýmyna qatysýǵa shaqyramyn», - dedi M. Pishembaev.
Óz kezeginde Chehııa bıznes-qaýymdastyǵy búgingi baılanystar aýqymyn keńeıtýge ázir ekendikterin, Qazaqstanmen jańa ekonomıkalyq qarym-qatynastar ornatýǵa qyzyǵýshylyq tanytatyndyqtaryn jetkizdi.
