Chehııa Qazaqstandy Ortalyq Azııadaǵy negizgi áriptesterdiń biri retinde qarastyrady
ASTANA. KAZINFORM — Elimizden Chehııaǵa zyǵyr, kúnbaǵys tuqymdary jáne jańǵaqtar, burshaq tuqymdas daqyldar men balyq sharýashylyǵy ónimderi eksporttalady. Bul týraly QR Aýyl sharýashylyǵy mınıstrligi habarlady.
QR Aýyl sharýashylyǵy vıtse-mınıstri Ermek Kenjehanuly Cheh Respýblıkasynyń Aýyl sharýashylyǵy vıtse-mınıstri Pavel Sekachpen kezdesý ótkizdi.
Taraptar ósimdik sharýashylyǵy, mal sharýashylyǵy, akýamádenıet jáne aýyl sharýashylyǵy ónimderin qaıta óńdeý salalaryndaǵy ekijaqty yntymaqtastyqtyń qazirgi jaı-kúıi men perspektıvalaryn talqylady.
— 2024 jyldyń qorytyndysy boıynsha agroónerkásiptik keshen ónimderiniń taýar aınalymy 20,8 mln AQSh dollaryn qurap, ótken jylmen salystyrǵanda 13%-ǵa artty. 2025 jyldyń 8 aıynda bul kórsetkish 10,7 mln AQSh dollar boldy, — delingen aqparatta.
Qazaqstan Chehııaǵa zyǵyr jáne kúnbaǵys tuqymdaryn, jańǵaqtar, burshaq tuqymdas daqyldar men balyq sharýashylyǵy ónimderin eksporttaıdy.
Ermek Kenjehanuly eki el arasyndaǵy saýda-ekonomıkalyq yntymaqtastyq áleýeti qazirgi deńgeıden áldeqaıda joǵary ekenin atap ótip, ózara saýdanyń kólemin arttyrý jáne aýyl sharýashylyǵy shıkizatyn qaıta óńdeý salasynda kooperatsııany damytý baǵytynda birlesken jumysty jandandyrýdy usyndy.
Taraptar selektsııalyq mal sharýashylyǵyn damytý máselesine erekshe nazar aýdardy.
2011–2024 jyldar aralyǵynda Qazaqstan Cheh Respýblıkasynan 12 myńnan astam sımmental jáne gereford asyl tuqymdy iri qara malyn ımporttady.
Kezdesýde sondaı-aq cheh selektsııasynyń genetıkalyq materıalyn qaıta jetkizý, maldy azyqtandyrý men ustaý tehnologııalaryn Qazaqstannyń klımattyq jaǵdaılaryn eskere otyryp qoldaný máseleleri talqylandy.
Qazaqstandyq tarap mal sharýashylyǵy keshenderin jobalaý kezinde cheh tehnologııalaryn paıdalaný jáne energııa tıimdi sheshimderdi engizý boıynsha qyzyǵýshylyq bildirdi.
— Kelissózderdiń taǵy bir blogy balyq sharýashylyǵy men akýamádenıetti damytýǵa arnaldy. 2018 jyldan bastap S. Seıfýllın atyndaǵy Qazaq agrotehnıkalyq ýnıversıteti Cheh Respýblıkasynyń Ońtústik Bogemııa ýnıversıtetimen yntymaqtasyp keledi, onyń aıasynda Qazaqstan–Cheh akýakýltýra ortalyǵy qurylǵan, — dep jazdy mınıstrliktiń baspsóz qyzmeti.
Ortalyq baǵaly balyq túrlerin ósirýmen jáne birlesken ǵylymı jobalardy iske asyrýmen aınalysady. Taraptar tájirıbe almasýdy jalǵastyrý jáne kadrlardy daıarlaý boıynsha birlesken baǵdarlamalardy júzege asyrý týraly ýaǵdalasty.
Qazaqstan Respýblıkasy Aýyl sharýashylyǵy vıtse-mınıstri chehterdiń aýyl sharýashylyǵyn tsıfrlandyrý tájirıbesin, sonyń ishinde dálme-dál eginshilik júıelerin, avtomattandyrylǵan sýarý jáne jasandy ıntellekt tehnologııalaryn qoldaný tájirıbesin zertteýge qyzyǵýshylyq bildirdi.
Óz kezeginde Pavel Sekach Chehııanyń Qazaqstandy Ortalyq Azııadaǵy negizgi áriptesterdiń biri retinde qarastyratynyn jáne mal sharýashylyǵy, agrarlyq mashına jasaý jáne ǵylymı almasýlar salalaryndaǵy yntymaqtastyqty damytýǵa múddeli ekenin atap ótti.
Kezdesý qorytyndysynda taraptar ekijaqty ózara is-qımyldy tereńdetýge jáne naqty birlesken jobalardy júzege asyrýǵa daıyn ekendikterin rastady.
Eske sala keteıik, elimizge Chehııadan kerqulan ákelý 2029 jylǵa deıin jalǵasady.