Chehııa bıznesi Qazaqstanǵa nege qyzyǵyp otyr
ASTANA. KAZINFORM – Chehııanyń energetıka, qorǵanys, kólik, taý-ken qazý ónerkásibi t.b. sektorlaryndaǵy bıznes ókilderi elimizge qyzyǵýshylyq tanytyp otyr. Bul jóninde Chehııa Premer-mınıstri Andreı Babısh Qazaqstan – Chehııa bıznes forýmynda málimdedi.
– Qazaqstan terrıtorııalaq jaǵynan ǵana emes, ambıtsııasy turǵysynan da alyp el. Astananyń jarqyn keleshegi, Almatynyń óndiristik qýaty, Kaspııdiń baı energetıkalyq qory – bulardyń bári arqyly Qazaqstan transformatsııa men kóshbasshylyqqa qabiletti ekenin dáleldep qoıǵan. Búginde bul el qurlyqtar arasyndaǵy kópir ǵana emes, sondaı-aq ınnovatsııa men strategııalyq ınvestıtsııalardyń jahandyq ortalyǵy. JІÓ boıynsha da sizderdiń elińiz – Ortalyq Azııadaǵy eń damyǵan memleketterdiń biri. EO-da biz úshin mundaı JІÓ kórsetkishi – arman ǵana, – dedi ol.
Sonymen birge, Chehııa Premer-mınıstri Qazaqstan men Chehııa qarym-qatynasy ózara syılastyq jáne ortaq jobalardy sátti júzege asyrýdaǵy tájirıbe negizinde qurylǵanyn atap ótti.
– Bizdiń munda kelýimiz tyǵyz baılanys pen seriktestiktiń tereń tarıhyn dáleldeıdi. Buǵan deıin biraz jobany birlesip, tabysty atqardyq. Biraq eń jaqsy dúnıeler áli de alda. Biz Qazaqstanǵa ýaqytsha qyzyǵýshylyqpen emes, uzaq merzimdi strategııalyq turǵyda qaraımyz. Alaıda strategııa ázirge sóz júzinde qalyp otyr. Ony iske asyrý úshin úzdik mamandarymyzdy alyp keldik, – dedi Andreı Babısh.
Sonymen birge, ol sońǵy jyldarda qos memleket arasyndaǵy taýar aınalymy artyp, ınvestıtsııalyq seriktestik ilgerilegenin, sonyń arqasynda ekonomıkalyq yntymaqtastyq nyǵaıǵanyn málimdedi.
Budan bólek, onymen birge Chehııadan energetıka, qorǵanys, kólik, taý-ken qazý ónerkásibi t.b. sektorlardaǵy bıznes ókilderi kelgenin atap ótti.
Chehııa Premer-mınıstri forým nátıjesinde seriktestik keńeıip, jańa jobalar júzege asatynyna senim bildirdi.
Aıta keteıik, buǵan deıin Qazaqstan Chehııany senimdi seriktes retinde qarastyratynyn jazǵanbyz.
