Chehııa azamattarynyń Qazaqstandaǵy týrıstik baǵdarlarǵa qyzyǵýshylyǵy artyp keledi - Elshi
ASTANA. QazAqparat - Chehııa barǵan qazaqstandyq týrısterdiń sany 70 myńnan asqan kezder boldy. Bul týraly búgin QR Syrtqy ister mınıstrliginde ótken baspasóz máslıhatynda Qazaqstannyń Chehııadaǵy Elshisi Serjan Ábdikárimov málim etti.
Onyń sózine qaraǵanda, eki el azamattarynda týrıstik qyzyǵýshylyq artyp keledi.
«Sońǵy jylda Pragada bizdiń elshilik beretin vızalar sany artyp keledi. 2015 jyly jáne bıyl cheh bıznesmenderine beretin vızalardyń turaqty túrde artyp kele jatqanyn baıqap otyrmyz. ıAǵnı, tek bıznesmenderge ǵana emes, sonymen qatar týrıstik maqsatta keletinderdiń qatary qalyńdap keledi. Ásirese, Chehııa azamattaryna bizdiń kórkem tabıǵatymyz, taýlar, Uly Jibek joly unap otyr. Osy rette biz bul eldiń azamattaryna berilgen týrıstik vızalardyń óskenin aıta alamyz»,-dedi S. Ábdikárimov.
Sonymen qatar ol Chehııa burynnan tanymal týrıstik baǵyt retinde belgili ekenin eske salyp ótti. Bul eldiń mıneraldy bulaq kózderi erekshe suranysqa ıe. Atap aıtqanda, jaz kezinde adamdar kóp baratyn maýsymda qazaqstandyq týrısterdiń sany 70 myńnan asqan kórinedi. Astanadaǵy cheh elshiliginiń málimeti qaraǵanda, qazaqstandyqtarǵa ótken jyly 12 myń vıza berilgen eken.
Aıta keteıik, bıyldyń tórt aıynda Qazaqstannyń Pragadaǵy dıplomatııalyq ókildigi Chehııa azamattaryna 738 vıza berdi.
