Cheh tiline aýdarylǵan Abaıdyń «Qara sózderi» kitap bolyp shyqty

PRAGA. QazAqparat - Abaıdyń 175 jyldyǵy qarsańynda Qazaqstannyń Chehııadaǵy Elshiligi Qazaqstannyń Ulttyq akademııalyq kitaphanasymen birlesip cheh tiline aýdarylǵan «Qara sózder» kitabynyń onlaın tanystyrylymyn ótkizdi, dep habarlaıdy QazAqparat.

Іs-sharaǵa belgili qoǵam qaıratkerleri, ǵalymdar, Qazaqstan men Chehııanyń ǵylymı toptary men buqaralyq aqparat quraldarynyń ókilderi qatysty.

Qazaqstandyq dıplomattar Qazaqstan Táýelsizdiginiń 30 jyldyǵy qarsańynda uly aqynnyń sózderi erekshe mánge ıe bolatynyn atap ótti.

Cheh «Azııa dostary klýbynyń» jetekshisi, professor, fılosofııa ǵylymdarynyń doktory Irjı Shıma kitaptyń jaryq kórýi cheh jurtshylyǵyna álemdik ádebıettiń damýy men qalyptasýyna ólsheýsiz úles qosqan qazaqtyń uly aqynynyń shyǵarmashylyǵymen tanysýǵa múmkindik beretinine senim bildirdi.

Karlov ýnıversıtetiniń professory Tomas Kýchera: «Qazaqtyń oıshyly jáne aqyny Abaıdyń kitaby teńdesi joq basylym. Bul cheh oqyrmandaryna qazaq halqynyń tarıhyn tereńirek túsinýge múmkindik beredi jáne bul bizdiń mádenıetterimizdi jaqyndastyratyny sózsiz», dedi.

Cheh buqaralyq aqparat quraldary ókilderiniń sózderi de qyzyǵýshylyqpen tyńdaldy.

Qazaqstandyq taraptan prezentatsııaǵa qatysqandar: QR Ulttyq akademııalyq kitaphanasynyń bas dırektorynyń orynbasary Álııa Qojabekova, «Qazaqstan Jazýshylar odaǵynyń» tóraǵasy, aqyn Ulyqbek Esdáýlet, M.Áýezov atyndaǵy ádebıet jáne óner ınstıtýtynyń dırektory Kenjehan Mamytjanov.

Cheh tiline aýdarylǵan «Abaıdyń qara sózderin» Qazaqstan Respýblıkasynyń Elshiligi Pragadaǵy bilim berý mekemeleriniń kitaphana qoryna jiberedi.