Cheh armııasy jańa sarbazdardy qabyldaý boıynsha rekord ornatyp otyr

ASTANA. KAZINFORM — 2026 jyly Chehııa armııasy 2250 sarbaz qabyldaýdy josparlap otyr. Bul kórsetkish el tarıhyndaǵy eń joǵary deńgeılerdiń biri bolmaq, dep habarlaıdy Kazinform agenttiginiń menshikti tilshisi. 

Rekordtyq áskerge shaqyrý 2006 jyly tirkelgen edi,  ol kezde 2262 adam áskerı qyzmetke jazylǵan. Alaıda bıyl bul kórsetkish odan da asyp túsýi múmkin, dep jazady jergilikti BAQ.

Bıylǵy maqsat — 2100 jańa sarbaz qabyldaý bolǵan, biraq jyldyń sońyna deıin olardyń sany 2300-den asýy yqtımal.

— Qorǵanys mınıstrliginiń memlekettik hatshysy Petr Vanchýra 2026 jylǵa arnalǵan qabyldaý josparyn bekitti. Bul josparǵa sáıkes, armııa 2250 jańa sarbaz qabyldaıdy, — dedi mınıstrliktiń baspasóz qyzmetiniń ókili Magdalena Hınchıkova.

Bıylǵy 2100 sarbaz qabyldaý jospary tamyz aıynyń sońynda oryndaldy, dep málimdedi armııanyń kadr agenttiginiń dırektory Vladımır Stýdeny.
Jyl sońyna deıin negizgi oqý kýrsyna taǵy 200 oryn qaldy.

— Bul oryndardy esh qıyndyqsyz toltyramyz, — dedi kadr agenttiginiń ókili Iva Bednarjova.

Jyl basynda Chehııa armııasynyń qatarynda 28 285 áskerı qyzmetker bolǵan, oǵan áskerı polıtsııa, áskerı barlaý qyzmetkerleri jáne Brnodegi Qorǵanys ýnıversıtetiniń stýdentteri kiredi.

Jańa sarbazdardy qabyldaý jospary eki negizgi krıterııge súıene otyryp aıqyndalady. Hınchıkovanyń aıtýynsha, ol kelesi jyldyń bıýdjet jobasyna jáne aǵymdaǵy jyly qyzmetin aıaqtaıtyn sarbazdardyń sanyna baılanysty esepteledi.

2025 jyly shaqyrylǵandar men qyzmetin aıaqtaǵan nemese aıaqtaıtyn sarbazdar arasyndaǵy aıyrmashylyq 650 adamǵa oń nátıje bermek.

Bednarjovanyń aıtýynsha, bul sońǵy bes jyldaǵy eń úzdik nátıje bolady.

Sondaı-aq Chehııa 2030 jylǵa deıin JІÓ-niń 3%-yn qorǵanysqa bólýdi josparlap otyr.