Chedjýdaǵy festıval: qazaqstandyq hor kórermenniń erekshe yqylasyna bólendi
ChEDJÝ. KAZINFORM - Ońtústik Koreıada ótken IX Halyqaralyq hor festıvaliniń ashylý saltanatynda E. Rahmadıev atyndaǵy Memlekettik akademııalyq fılarmonııanyń Kameralyq hory qatysyp, qazaqstandyq ónerdiń joǵary deńgeıin pash etti.
Delegatsııany «Qazaqstan-Azııa saýda jáne mádenıetti damytý qaýymdastyǵynyń» prezıdıým tóraǵasy, QR óner qaıratkeri, professor Dúısen Qaseıinov bastap bardy.
Festıval barysynda qazaqstandyq hordyń óneri talǵamy joǵary kórermenniń erekshe yqylasyna bólendi. Kórermen qazaqtyń ulttyq kıiminiń ásemdigine, ánderdiń áýezdiligi men júrekke jetetin názik ıirimderine tánti boldy. Ásirese, dombyranyń súıemeldeýimen oryndalǵan «Men, men edim» (Mahambet Ótemisuly) jáne «On alty qyz» ánderi kórermendi baýrap, kontserttiń sharyqtaý shegine aınaldy.
«Men, men edim» tolǵaýyn horǵa laıyqtap óńdegen — ujymnyń daryndy ánshisi ári mýzykalyq kórkemdeýshi Erbolat Abylaı. Al ánniń solo-oryndaýshysy — Aqjol Serikov. Aqjoldyń árbir notadaǵy sezimtaldyǵy men sahnadaǵy jarqyraǵan harızmasy kórermenderdiń zor qoshemetine ıe boldy.
Úsh kúnge jalǵasqan festıval baǵdarlamasy aıasynda Fılormonııanyń kameralyq hory qazaqtyń dástúrli ánderimen qatar, álemdik klassıka men zamanaýı shyǵarmalardy oryndady.
Hor repertýarynda:
· «Taý ishinde» (Sáken Seıfýllın, Beıimbet Demeýov) — jeke oryndaýshy Sanııa Nıǵmetova;
· «On alty qyz» (qazaq halyq áni, Saltanat Bekmaǵambetova) — jeke oryndaýshy Aqjol Serikov;
· «Aınalaıyn» (Álıbı Ábdınurov);
· «Qarlyǵash» (Ahmet Jubanov, Ibadolla Matakov, Anatolıı Molodov);
· «Men, men edim» (Mahambet Ótemisuly) — jeke oryndaýshy Aqjol Serikov;
· «Bir bala» (qazaq halyq áni, Saltanat Bekmaǵambetova) — jeke oryndaýshy Indıra Aıtbergen;
· «Las olas de la mar» (Martına Kamargo, Hýan Manýel Ernandes-Morales) — jeke oryndaýshy Indıra Aıtbergen;
· «Jaıdarman» (qazaq halyq áni, Latıf Hamıdı);
· «Qamajaı» (qazaq halyq áni, Borıs Lıashko).
Festıval aıasynda hor ujymy ár kún saıyn jańa baǵdarlama usyndy, bul kórermenderge qazaq mádenıetiniń san qyrly boıaýyn tereńirek sezinýge múmkindik berdi. Ásirese, dombyranyń názik úni men solısterdiń jandy oryndaýy kórermenderdi erekshe áserge bóledi.
32 talantty ánshi óner kórsetetin hordyń kórkemdik jetekshisi — Qazaqstannyń eńbek sińirgen qaıratkeri Gúlmıra Quttybadamova, bas hormeıster — Danara Tashatova.
Ońtústik Koreıanyń Chedjý aralynda ótken IX Halyqaralyq hor festıvali — álemniń túkpir-túkpirinen kelgen úzdik hor ujymdaryn biriktirgen aıryqsha mýzykalyq shara. Festıvaldiń basty maqsaty — ár eldiń mádenıetin, ulttyq mýzykalyq dástúrlerin kórsetý jáne hor óneriniń sıqyrly áleminde ózara tájirıbe almasý.
Eske sala keteıik, buǵan deıin Dúısen Qaseıinov dástúrli mýzyka jáne bı halyqaralyq uıymynyń elshisi atanǵanyn jazǵan bolatynbyz.