«Chaıka» avtokóliginiń alǵashqy úlgisi Qyzylordada saqtaýly
QYZYLORDA. KAZINFORM — Qyzylorda oblystyq tarıhı-ólketaný mýzeıiniń memlekettik tirkeýinde turǵan erekshe eksponattardyń biri — aty ańyzǵa aınalǵan «Chaıka» avtokóligi. Kóliktiń alǵashqy úlgisi mýzeı qoryna qalaı ótkeni, tarıhy týraly Kazinform tilshisine mýzeıdiń ekskýrsııalyq-kópshilik bóliminiń meńgerýshisi Elzıra Naǵashybaıqyzy aıtyp berdi.
Kóliktiń alǵashqy úlgisi mýzeı qoryna qalaı ótkeni, tarıhy týraly Kazinform tilshisine mýzeıdiń ekskýrsııalyq-kópshilik bóliminiń meńgerýshisi Elzıra Naǵashybaıqyzy aıtyp berdi.
«Chaıka» — 1959-1988 jyldar aralyǵynda Reseıdegi eń iri kommertsııalyq kólik óndirýshi «Gorkıı» avtomobıl zaýytynan shyǵarylǵan tehnıkalyq deńgeıi joǵary óte tanymal marka.
Ereksheligi sonda, ol eshqashan satylymda bolmaǵan.
— 1985 jyldary Keńes Odaǵynda qaıta qurý kezeńi bastalǵan tusta óńirdi memleket jáne qoǵam qaıratkeri Erkin Áýelbekov basqarǵan bolatyn. Osy jyldary zaýyttan shyqqan nebári 4 «Chaıka» kóliginiń bireýi bizdiń aımaqqa buıyrdy. Bul kóliktiń kelýine elimizdiń birneshe óńirinde basshylyq qyzmette bolǵan sol kezdegi oblystyq partııa komıtetiniń ekinshi hatshysy, 1989 jyldan táýelsizdik alǵanǵa deıin oblystyq atqarý komıtetiniń tóraǵasy qyzmetin atqarǵan Vıtalıı Brynkın yqpal etken, — dedi Elzıra Naǵashybaıqyzy.
Kóneniń kózindeı dúnıe 2005 jyly sol kezdegi oblys ákimi apparatynyń basshysy Ǵaınýlla Jarqynbaevtyń tapsyrmasymen ákimdiktiń teńgeriminen shyǵarylyp, tarıhı-ólketaný mýzeıine syıǵa tartylǵan.
— Nebir sheteldik brendti shań qaptyratyn, tehnıkalyq sapasy men qýaty joǵary «Chaıkany» Brynkınniń tapsyrmasymen buryn oblys basshysynyń kólik júrgizýshisi bolǵan Baýyrjan Ospanov ákelgen eken. Ony Máskeý qalasynan general Maksımov qarsy alyp, «Vnýkovo» áýejaıynan kólikti úlken áskerı ushaqqa tıep, ózderin basqa ushaqqa otyrǵyzyp, Baıqońyr qalasyna attandyrady. Elge kelgen soń Baıqońyr qalasynan Qyzylordaǵa jetkizedi. Qazaqstan, onyń ishinde Qyzylordaǵa buıyrǵan baǵasy qundy temir tulpardy sol kezdegi basshylar da kózdiń qarashyǵyndaı saqtaǵan, — dedi mýzeı qyzmetkeri.
2021 jyly «Mýzeıge syı» aktsııasy ótip, «Chaıkanyń» eń alǵashqy júrgizýshisi otyz bes jyldan keıin kólik rýline qaıta otyrdy.
Buǵan deıin habarlaǵanymyzdaı, Aral teńiziniń baılyǵyn ıgerýde erekshe mańyzǵa ıe bolǵan Aral balyq kombınatynyń qurylǵanyna bıyl 100 jyl tolyp otyr.