Chavestiń jankúıerleri Alvaresti GGG-den qashyp júrgeni úshin kelemejdedi
ASTANA. QazAqparat - Meksıkada ótken sharalardyń birinde kishi Hýlıo Sezar Chavestyń jankúıerleri Saýl «Kanelo» Alvaresti qazaqstandyq boksshy Gennadıı Golvkınnen qashyp júrgeni úshin kelemejge aınaldyrdy, dep habarlaıdy QazAqparat tilshisi áleýmettik jelidegi «Qazaqstannyń kásibı boksy» tobyna silteme jasap.
Boks jankúıerleri baspasóz máslıhatyna arnaıy bannerdi jasap keldi. Shara barysynda fanattardyń biri «Oskar áke, meni GGG-dan qorǵap qalshy» degen jazýy bar transporantty kóterip júrdi. Onymen jankúıerler óz jerlesteri Saýl «Kanelo» Alvares pen onyń promoýteri Oskar De La Hoııanyń GGG-ge qarsy jekpe-jekten qashyp júrgenderin synǵa alyp, kelemej etti.
Aıta keteıik, Saýl Alvares pen Hýlıo Sezar Chaves arasyndaǵy jekpe-jek mamyrdyń 6-sy kúni AQSh-ta ótedi. Buǵan deıin kishi Chavestiń ózi Alvarestiń GGG-den qashyp júrgeni jaıynda ashyq aıtqan. Al jankúıerleri aldynda uıatqa qalmaý úshin Chavesti tańdaǵan.
Búginde Oskar De La Hoııa da,Saýl Alvares te Gennadıı Golovkınge eń iri somaǵa usynys jasap,kelisimsharttyń bir nusqasyn jibergenderi jaıynda aıtyp jatyr. Alaıda ol usynysta 15 mln dollar kólemindegi gonorardan artyq eshteńe berilmeıdi dep jazylǵan kórinedi. GGG-diń komandasy oǵan kelispeı otyr. Sebebi ol jekpe-jekten odan da artyq tabys tabýǵa bolady.
Boks sarapshylarynyń aıtýynsha, Alvares oryndaýǵa kelmeıtin talaptardy qoıyp, ýaqytty barynsha sozýdy kózdeıdi. Al ekeýiniń jas aıyrmashylyǵyn eskersek, ýaqyttyń ótkeni meksıkalyq boksshyǵa tıimdi. Qazirgi kezde Saýl Alvares 26 jasta, al Gennadıı Golovkın bıyl 35-ke keledi.
