ChatGPT jumysynda aqaý boldy

ASTANA. KAZINFORM — ChatGPT chat-botynyń jahandyq isten shyǵýynan keıin OpenAI ınjenerlerine olqylyqtardy túzetip, júıeni qalypqa keltirýge 2 saǵattan astam ýaqyt qajet boldy, dep habarlaıdy Kazinform agenttiginiń menshikti tilshisi. 

 3 qyrkúıekte álem boıynsha paıdalanýshylar OpenAI kompanııasy ázirlegen jasandy ıntellektke negizdelgen tanymal ChatGPT chat-botynyń jumysynda aýqymdy aqaýǵa tap boldy. Qıyndyqtar servıs veb-nusqada da, iOS pen Android júıelerindegi mobıldi qosymshalarda da jaýap bermeı qalǵan kezde bastaldy.

ChatGPT-tiń barlyq derlik negizgi fýnktsııasy aqaýǵa ushyrady: veb, mobıldi jáne desktop nusqalarynda. Barlyǵy 23 komponent zardap shekti, olardyń ishinde: júıege kirý (Login), veb-ınterfeıs, iOS jáne Android mobıldi qosymshalary, WhatsApp, telefon qyzmeti CHAT-GPT, izdeý, keńeıtilgen derekterdi taldaý (Advanced Data Analysis), kontekstik konnektorlar jáne t.b.

Kóptegen paıdalanýshy áleýmettik jelilerde jasandy ıntellektten jaýap ala almaý jáne qosymshanyń durys istemeýi týraly jedel shaǵymdana bastady.

Downdetector portalynyń derekterine sáıkes, shaǵymdardyń eń kóbi Nıderlandtan túsken (2 700-den astam). Paıdalanýshylardyń 82%-y ChatGPT-tiń jumysyna baılanysty aqaýlardy, 15%-y saıttyń jumysyndaǵy problemalardy, taǵy 3%-y qosymshaǵa kirýdegi qıyndyqtardy tirkegen.

Chat-bottaǵy aqaýlar Ulybrıtanııa, Germanııa, Italııa, AQSh, Japonııa jáne basqa da birneshe elde baıqaldy.

OpenAI kompanııasy másele anyqtalǵan sátte-aq alǵashqy resmı habarlamasyn jarııalap, tergeý júrip jatqanyn rastady.

OpenAI ınjenerleri aqaýdyń sebebin anyqtap, ony joıýǵa kiristi. Astana ýaqytymen 17:23-te kompanııa servıs jumysynyń tolyq qalpyna kelgenin habarlady.

Osylaısha OpenAI chat-boty 133 mınýt boıy qoljetimsiz boldy.

Bul ChatGPT jumysyndaǵy alǵashqy iri aqaý emes. Buǵan deıin, 2025 jyldyń maýsym aıynda da tehnıkalyq qıyndyqtar tirkelip, olar jedel sheshilgen bolatyn.

Buǵan deıin Qazaqstanda 1 tamyzdan bastap ChatGPT jazylymynyń QQS saldarynan qymbattaıtyny habarlanǵan edi.