ChatGPT Ulybrıtanııadaǵy jańadan jumys bastaǵan qyzmetkerlerge suranysty azaıtty

ASTANA. KAZINFORM — ChatGPT chatboty iske qosylǵannan beri Ulybrıtanııada túlekter men taǵylymdamadan ótýshiler úshin bos jumys oryndary keminde 31,9%-ǵa qysqardy, dep habarlaıdy The Guardian.

Suranystyń tómendeýi týraly statıstıkany Adzuna jumys izdeý platformasy bergen. Jasandy ıntellektti barlyq jerde qoldaný kompanııalarǵa jumys tıimdiligin arttyrýǵa jáne qyzmetkerler sanyn qysqartýǵa kómektesetini atap ótildi. Osylaısha, tájirıbesiz mamandarǵa jumys tabý qıynǵa soǵyp otyr.

Atap aıtqanda, Ulybrıtanııa men Eýropadaǵy eń iri telekommýnıkatsııalyq kompanııalardyń biri British Telecommunications bıznes-protsesterdi ońtaılandyrý maqsatynda 2023 jyly 40-50 myń qyzmetkerin qysqartýdy josparlap otyrǵanyn habarlady.

Jasandy ıntellektpen qamtamasyz etetin Anthropic kompanııasynyń basshysy Darıo Amodeı bul tehnologııa aldaǵy bes jylda tájirıbesiz keńse qyzmetkerleriniń jartysyn jumyssyz qaldyratynyn eskertti.

Jasandy ıntellekt adamdarǵa kóbirek jumys oryndaryn ashady ma, joq pa degen pikirtalas áli de jalǵasyp jatyr. Halyqaralyq valıýta qorynyń baǵalaýy boıynsha, AQSh pen Ulybrıtanııa sııaqty damyǵan ekonomıkalardaǵy jumys oryndarynyń 60 paıyzy jasandy ıntellekttiń yqpalynda bolady.

Eske sala keteıik, Qazaqstanda Májilis depýtaty jasandy ıntellektige úlken senim artýǵa shaqyrdy.