ChatGPT paıdalanýshylarǵa úzilis jasaý týraly eskertý kórsetetin boldy

ASTANA. KAZINFORM — OpenAI kompanııasy osy aptada GPT-5 modelin shyǵaratyn tusta, ChatGPT-ke psıhıkalyq nemese emotsııalyq aýytqýdyń belgilerin jaqsyraq tanýǵa kómektesetin jańartýlar engizýde, dep habarlaıdy The Verge.

Bul maqsatta OpenAI mamandarmen jáne keńesshi toptarmen birlesip, ChatGPT-tiń osyndaı jaǵdaılardaǵy jaýaptaryn jaqsartý baǵytynda jumys istep jatyr.

Kompanııa GPT-4o modeliniń sandyraq nemese emotsıonaldyq táýeldilik belgilerin árdaıym durys tanı almaǵanyn moıyndady.

— Biz jasandy ıntellekt burynǵy tehnologııalarmen salystyrǵanda áldeqaıda jeke ári jaýapty bolyp kórinýi múmkin ekenin, ásirese psıhıkalyq nemese emotsııalyq kúızelis jaǵdaıyndaǵy osal adamdar úshin, jaqsy túsinip otyrmyz, — dep málimdedi OpenAI ókilderi.

ChatGPT-ti «deni saý paıdalanýǵa» yntalandyrý maqsatynda kompanııa uzaq sóılesý kezinde úzilis jasaý týraly eskertýlerdi engizip otyr. Mundaı jaǵdaıda ChatGPT «Siz biraz ýaqyttan beri sóılesip otyrsyz — úzilis jasaýǵa qolaıly sát bolar?» degen habarlama kórsetedi.

Qoldanýshyǵa dıalogty jalǵastyrý nemese aıaqtaý usynylady.

OpenAI mundaı eskertýlerdiń ýaqyty men formatyn bolashaqta da jetildire beretinin atap ótti. Uqsas fýnktsııalar qazirdiń ózinde YouTube, Instagram jáne TikTok sııaqty platformalarda qoldanylady.

Aıta keteıik, buǵan deıin ChatGPT-men júrgizilgen jeke áńgimelerdiń zańdyq turǵyda qorǵalmaǵany jáne sot protsesterinde paıdalanylýy múmkin ekeni habarlanǵan.