ChatGPT keńesinen keıin qaıtys bolǵan áıeldiń otbasy sotqa shaǵym túsirdi
ASTANA. KAZINFORM — AQSh-ta epılepsııa ustamasynan qaıtys bolǵan 31 jastaǵy Qytaı azamatynyń ata-anasy ChatGPT bergen keńesterge shaǵymdanyp OpenAI kompanııasyn sotqa berdi. Olar áıeldiń chatbottan alǵan medıtsınalyq keńesi qaıǵyly oqıǵaǵa ákep soqty dep málimdeıdi. Bul týraly The Guardian basylymy jazdy.
Shaǵymǵa qaraǵanda, Sıetlde turatyn ІT ınjener Boýen Van Amazon-nan jumystan shyǵarylǵannan keıin ChatGPT-ten keńes suraǵan. Ol AQSh-ta turaqty turý úshin jańa jumys izdep júrgen edi. Qabyldap júrgen epılepsııaǵa qarsy dárisi onyń aǵylshyn tilinde sóıleý qabiletine áser etedi dep oılaǵan. Suhbattan ótý úshin til bilý mańyzdy edi.
Talapkerlerdiń aıtýynsha, chatbot áıelge dári-dármektiń mólsherin 400 mg-nan birtindep azaıtyp, tolyq bas tartdy usynǵan jáne bul onyń sóıleý daǵdylaryn qalpyna keltirýge kómektesetinine sendirgen. Alaıda, bul emdeý tásilin dáriger taǵaıyndamaǵan.
Sonymen qatar, sot isine sáıkes, ChatGPT oǵan medıtsına qyzmetkerlerimen keńesýden aýlaq bolýǵa jáne dári-dármektiń mólsherin azaıtý josparlary týraly dárigerge habarlamaýǵa keńes bergen.
Dozany azaıta bastaǵannan keıin, áıelde fokaldy epılepsııalyq ustama belgileri paıda bolǵan. Naýqas chatbottan mıyna zaqym kelýi múmkin be dep suraǵanda, talapkerlerdiń aıtýynsha, JI onyń eshqandaı qaýip joq ekenine sendirgen.
Naýqastyń jaǵdaıy nasharlasa da, chatbot dozany azaıtýdy usyna bergen. 2026 jyldyń 12 aqpanynda Boýen Van epılepsııalyq talma saldarynan qaıtys boldy. Qytaıdaǵy ata-anasy qyzynan keletin habar toqtaǵan soń birden Sıetlge ushyp kelgen. Áıeldiń denesi 14 aqpanda tabyldy.
Qyzdyń otbasy OpenAI qosymsha qaýipsizdik mehanızmderin engizgende, qaıǵyly oqıǵanyń aldyn alýǵa bolar edi dep sanaıdy. Olar qyzynyń ólimi úshin ótemaqy jáne kompanııaǵa lıtsenzııasyz medıtsınalyq keńes berýge tyıym salatyn buıryq shyǵarýdy talap etip otyr.
OpenAI bul oqıǵany óte júrek aýyrtatyn jaǵdaı dep atady. Kompanııa ókili The New York Times gazetine áıeldiń ChatGPT-diń qazirgi ýaqytta ózekti emes nusqasyn paıdalanǵanyn málimdedi. Ol chatbottyń jańa nusqalary shuǵyl nazar aýdarýdy qajet etetin jaǵdaılardy jaqsyraq tanıtynyn aıtty.
Kompanııa sonymen qatar ChatGPT medıtsınalyq kómektiń ornyn basa almaıtynyn, degenmen jasandy ıntellekt paıdalanýshylarǵa medıtsınalyq aqparatty alýǵa, saqtandyrý máselelerin sheshýge jáne dárigerlermen keńesýge daıyndalýǵa kómektese alatynyn atap ótti.
Eske sala keteıik, Shvetsııa derekterdiń taralý qaýpine baılanysty ChatGPT pen Claude qoldanýǵa shekteý qoıdy.
ChatGPT mátinderi endi kórinbeıtin belgilermen belgilenedi.
