Qazaqsha sóıleıtin ChatGPT elektrondy úkimet portalyna ornalastyrylady
ASTANA. KAZINFORM – L.N. Gýmılev atyndaǵy EUÝ Jasandy ıntellekt ǴZI ǵalymdary ChatGPT chat-botynyń qazaq tilindegi otandyq analogin ázirlep shyǵardy. Endigi jerde qazaqstandyqtar jańa júıeniń kómegimen qajetti aqparatty naqtylaı alady.
ChatGPT – amerıkalyq kommertsııalyq emes OpenAl kompanııasynyń neırondyq jelisi. Ol arqyly jasandy ıntellektpen hat almasýǵa múmkindik bar. Kez kelgen suraq qoıyp, tapsyrma da bere alasyz. Sáıkesinshe, sońǵy ýaqytta bul jelige turǵyndardyń suranysy arta bastady.
Qazaq tilindegi nusqanyń shyǵýy ýaqyt enshisindegi másele edi. Muny L.N. Gýmılev atyndaǵy EUÝ «Jasandy ıntellekt» ǵylymı-zertteý ınstıtýtynyń qyzmetkerleri nebary 5 aıdyń ishinde sátti júzege asyra bildi.
– Biz qazaq tilinde tuńǵysh iri LLM til úlgisin jasadyq. Júıe neırondyq jeli negizinde qazaq tilindegi kez kelgen mátindi túsinýge jáne óz bilimine sáıkes jaýap berýge qabiletti. Bizdiń ChatGPT prototıpimiz qazaq tiliniń erejelerin túsinedi, áripter men býyndar, sózder men sóılemder arasyndaǵy barlyq tizbekterdi este saqtaıdy. ıAǵnı, qazaq tiliniń barlyq morfologııalyq jáne sıntaksıstik erejelerin meńgergen, – deıdi L.N. Gýmılev atyndaǵy EUÝ «Jasandy ıntellekt» ǵylymı-zertteý ınstıtýtynyń dırektory Álibek Barlybaev.
Jańa júıe, ásirese, oqýshylar men stýdentter arasynda zor suranysqa ıe bolady dep kútilýde.
– Mektep oqýshylary emtıhanǵa daıyndalý kezinde testtegi keıbir aqparatty, máselen, matematıka teńdeýi nemese hımııadaǵy termındi túsinbedi delik. Ózderi naqtylaǵysy keledi, biraq olardyń qasynda muǵalim bolmaıdy. Sondaı kezde balalar júıege suraq qoıyp, óte tez jáne qysqa jaýap alady. Bul tehnologııany jalpy bilim beretin kýrstardy jıi oqıtyn bastapqy kýrstardyń stýdentteri úshin de paıdalanýǵa bolady, – deıdi Á. Barlybaev.
Ǵalymdar jańa jasandy ıntellekt júıesine patent alyp úlgergen. Ázirge qazaqstandyqtar chat-bottyń kómegine júgine almaıdy. Júıe tolyqqandy qyzmet kórsetý úshin shetelden sýperkompıýterler satyp alynbaq.
– «Bul júıeni qazaqstandyqtar arasynda qalaı tanymal qylamyz?» degen saýalǵa jaýap izdedik. Aqyry eGov portalyna ornalastyrý tıimdi bolatynyna kóz jetkizdik. Sol baǵytta jumys istep jatyrmyz. Jyl sońyna deıin iske qosamyz degen josparymyz bar. Júıe portal qoldanýshylaryna qajetti aqparattardy jedel saraptap, qujattaryn retteýge múmkindik beredi, – deıdi Á. Barlybaev.
Qazaq tilindegi jańa jasandy ıntellekt júıesin ǵalymdar - Álibek Barlybaev pen Ásel Muqanova ázirlegenin atap ótken jón. Búginde jobanyń tehnıkalyq jáne serverlik múmkindikterin nyǵaıtý jumystary jalǵasýda.
