ChatGPT-ge syr aıtýǵa bolmaıdy
ASTANA. KAZINFORM — ChatGPT-ge qupııańdy aıtýǵa bolmaıdy. Kazinform tilshisine dál osylaı dep pikir bildirgen IT mamany Ǵasyr Quralbaıuly munyń sebebin túsindirdi.
— ChatGPT-ge jazǵan jazbalarymyzdy derbes derekterge jatqyzýǵa bolady. Sol sebepti bul qosymshamen dıalog kezinde de óz aqparattarymyzdy qorǵaýymyz kerek. Adamdar onda óziniń sentımentaldy suraqtaryn qoıyp, eshkimge aıta almaǵan dúnıelerin aıtýy múmkin. Eger ol derekter syrtqa shyǵyp ketse, bul óte qaýipti. Sebebi eshqandaı júıe bizge bolashaqta aqparat qoldy bolmaıtynyna 100% kepildik bermeıdi, — deıdi sarapshy.
Ǵasyr Quralbaıuly bul qaǵıdany ásirese memlekettik qyzmetkerler qatań ustanýy kerektigin eskertti.
— Oǵan qosa, memleketke qyzmet etetin azamattar, mysaly, depýtattar, áskerı qyzmetkerler ChatGPT-ge buryn-sońdy esh jerde jarııalanbaǵan jobalardy, áskerı qupııalardy bólisýi múmkin. Sol sebepti men óz sabaqtarymda únemi memlekettik qyzmetshilerge eskertip otyramyn. Ákimder, áskerıler, qandaı da bir aqparatqa ıe memlekettik qyzmetkerler áli jarııalanbaǵan ulttyq jobalardy, áskerı qupııalardy, turǵyndardyń derekterin ChatGPT-men bólispeýi kerek. Aıta qalǵan kúnniń ózinde, múmkindiginshe búrkenshik atpen bólisken durys. Sonda ǵana biz derekterdi qorǵaı alamyz, — deıdi ol.
XXІ ǵasyrdaǵy belsendi jeli qoldanýshylardyń vırtýaldy dosyna aınalǵan qosymshanyń ózinen de surap kórdik. Jasandy ıntellekt bul máselege qatysty bylaı deıdi:
— ChatGPT sekildi jasandy ıntellekt platformalary — bulttyq júıeler arqyly jumys isteıdi. ıAǵnı, engizilgen mátinder serverlerde óńdeledi. Adamdar ChatGPT-men syrlasý sekildi áreketke baratyny ras. Bul psıhologııalyq turǵyda túsinikti bolsa da, jeke nemese ıntımdik málimetterdi engizý — táýekel. Júıe olardy arnaıy paıdalanbaıdy, biraq qate konfıgýratsııa nemese shabýyl jaǵdaıynda bul derekterdiń syrtqa shyǵý yqtımaldyǵy joq emes. Jasandy ıntellektimen jumys istegende negizgi jaýapkershilik qoldanýshyda. Sol sebepti, qupııa, derbes nemese áli jarııalanbaǵan aqparattardy munda engizbeý — eń durys sheshim.
Aıta keteıik, endi ShQO-da eńbek qaýipsizdigin jasandy ıntellekt baqylaıdy.
Oǵan qosa, aqyldy júıe bedeýlikpen kúresýge de kómektesedi.