ChatGPT-ge qylmys týraly habarlaǵan AQSh stýdenti sottaldy
ASTANA.KAZINFORM - AQSh-ta jasandy ıntellektpen (JI) hat almasý sot isinde basty aıǵaq retinde qoldanyldy, dep habarlaıdy Bild.
Mıssýrı ýnıversıtetiniń 19 jastaǵy stýdenti kampýs aýmaǵynda búlik jasap, 17 kólikti zaqymdap, terezelerin syndyrǵan.
Beınebaqylaý kameralary onyń qylmys ornynda bolǵanyn kórsetti, biraq sheshýshi dálel onyń ChatGPT-men hat almasýy boldy. Oqıǵadan kóp uzamaı stýdent chat-bottan túrmege túsemin be dep suraǵan. Sonymen qatar ChatGPT-ge «túkke turǵysyz kólikterdi» syndyrǵanyn moıyndaǵan.
Tergeýshiler hat almasýdy óz kinásin moıyndaý dep sanady.
The Smoking Gun atap ótkendeı, tergeýshiler hat almasýdy oqýǵa kúdiktiniń kelisimimen qol jetkizgen.
Stýdent qamaýǵa alynyp, oǵan múlikke qasaqana zııan keltirdi degen aıyp taǵyldy. Ol Grın okrýginiń túrmesinde qamaýda otyr, biraq 7500 dollar kepilge bosatylǵan.
ChatGPT-men jeke sóılesýler zańmen qorǵalmaǵan jáne sotta qoldanylýy múmkin ekenin buǵan deıin habarlaǵanbyz.