ChatGPT Eýropada jarnama kórsete bastady
ASTANA.KAZINFORM — 24 tamyzdan bastap ChatGPT-diń tegin nusqasyn paıdalanýshylar, sondaı-aq Go tarıfin paıdalanýshylar JI-men dıalog arqyly jarnama kóre alady, dep habarlaıdy DW.
OpenAI kompanııasy budan bylaı marketologtarda «adamdardy qandaı da bir zatty belsendi izdeý, salystyrý jáne sheshim qabyldaý kezinde ózine qaratyp alýdyń jańa tásili» bar ekenin aıtty. Olar jarnama neırondyq jeli jaýabynan bólek bolatynyn jáne jarnama berýshiniń chat tarıhyna qol jetkize almaıtynyna ýáde berdi. Sebebi «keıbir paıdalanýshylar ChatGPT-ge jeke aqparattaryn senip aıtady». Sarapshylar pikirinshe bul úlken qaýip týdyrýy múmkin.
— Kópshiligi ChatGPT-di tikeleı ári beıtarap jaýap beretindikten qoldanady jáne olar izdeý júıesindegideı aldylarynan jarnama shyǵa bergenin qalamaıdy. Tym kóp jarnama paıdalanýshylardyń senimin buzýy múmkin, — dedi Vıýrtsbýrg ýnıversıtetiniń professory Alısııa fon Shenk Tagesschau baǵdarlamasyna.
Keıbir sarapshylar modelderdiń óz usynystarynda beıtarap bolyp qalatynyna kúmán keltiredi, sebebi olar jarnama berýshilerden aqsha alatyn jasaýshysynyń kommertsııalyq múddesi úshin áreket etýi múmkin.
OpenAI bastapqyda AQSh-ta, Kanadada jáne Japonııada jarnamany synaqtan ótkizdi, endi 31 eýropalyq elge taratpaqshy. Microsoft qazirdiń ózinde Copilot-ta jarnamalardy ornalastyryp jatyr, al Google olardy jasandy ıntellektpen jumys isteıtin izdeý júıesine biriktirip jatyr, dep atap ótti sarapshylar. Alaıda, Anthropic buǵan deıin Claude-ta jarnama bolmaıtynyn ashyq aıtqan bolatyn.
Buǵan deıin OpenAI jasóspirimderge arnalǵan ChatGPT-diń arnaıy nusqasyn iske qosty.
