ChatGPT endi kóredi, estıdi jáne sóıleı alady
OpenAI kompanııasynyń ChatGPT chat-boty endi «kóredi, estıdi jáne sóıleı alady» nemese aıtylǵan sózderdi túsinip, sıntetıkalyq daýyspen jaýap berip, sýretterdi óńdeı alady. QazAqparat bul týraly CNBC basylymyna silteme jasap habarlaıdy.
Kompanııa málimetine sáıkes, chat-bottyń bul jolǵy jańarýy GPT-4 paıda bolǵannan bergi – eń irisi. Ol qoldanýshylarǵa ChatGPT mobıldik baǵdarlamasyndaǵy dybystyq áńgimelerge aralasýǵa, bot jaýap beretin bes sıntetıkalyq daýystyń birin tańdaýǵa múmkindik beredi. Sonymen qatar paıdalanýshylar ChatGPT kómegimen sýret almasa alady.
Jańa baǵdarlama aqyly qoldanýshylar úshin aldaǵy eki apta ishinde qoljetimdi bolady. Dybystyq fýnktsııaǵa iOS jáne Android qosymshalarynda shekteý bar, degenmen sýretterdi barlyq platformada óńdeýge múmkindik jasalǵan.
Tehnologııa alyptary, ásirese osy jazda, chat-bottarǵa jańa qosymsha ǵana emes, jańa qyzmet qosýǵa da tyrysyp jatyr. Google óziniń Bard chat-botynyń kóptegen jańalyqtary bar ekenin málim etti, al Microsoft kompanııasy Bing júıesine vızýal izdeýdi qosty.
Óz kezeginde sarapshylar jasandy ıntellekt túrlendiretin sıntetıkalyq daýystarǵa alańdaýshylyq bildirdi. Sebebi olar senimdi dıpfeık týdyrýy múmkin. Kıberqaýipsizdik júıesine ený úshin dıpfeıkti qalaı paıdalanýǵa bolatynyna zertteý bastalyp ta ketken.
