ChatGPT Brazılııada ulyn óltirýdi josparlaǵan er adamdy anyqtaýǵa kómektesti
ASTANA. KAZINFORM — Brazılııada ChatGPT-men júrgizilgen hat almasý óz ulyn óltirýdi josparlady degen kúdikke ilingen er adamnyń ustalýyna sebep boldy, dep habarlaıdy BILD.
36 jastaǵy fermer eki aıdan astam ýaqyt boıy jasandy ıntellektpen egjeı-tegjeıli sóılesip, 8 jastaǵy ulyn jáne ózin óltirýdi josparlaǵan. Chat-bottyń qaýipsizdik júıesi qaýipti áreketti anyqtap, polıtsııaǵa habarlaǵan.
Habarlamalar tizbegi halyqaralyq deńgeıde áreket etken. Er adamnyń jazbalaryndaǵy sıpattamalar jasandy ıntellekt júıesiniń qaýipsizdik dabylyn iske qosqan. ChatGPT operatory OpenAI bul týraly AQSh-tyń Federaldyq tergeý bıýrosyna (FBR) habarlaǵan. FBR óz kezeginde Brazılııa bıligimen baılanysqa shyqqan. Aqparat Brazılııa Ádilet mınıstrliginiń tehnologııalyq bólimshesi Ciberlab-qa berildi.
Úsh kúnnen keıin polıtsııa operatsııa júrgizip, er adamdy qamaýǵa aldy. Tergeýshilerdiń aıtýynsha, ol josparyn 4 kúnnen keıin júzege asyrmaq bolǵan.
Polıtsııa málimetinshe, kisi óltirýdi josparlaýynyń sebebi qarapaıym bolǵan: er adam balasyna alıment tóleýden qutylǵysy kelgen jáne ulymen eshqandaı qarym-qatynasy bolmaǵan. Páterin tintý kezinde tergeýshiler belgisiz zat quıylǵan 4 bótelke men arqan tapqan.
Er adam 54 kún qamaýda bolǵannan keıin 13 tamyz kúni bosatyldy. Sot onyń bosatylýyn tergeýdiń tym uzaqqa sozylýymen túsindirdi. Endi ol elektrondy bilezik taǵyp júrýge mindetti. Sondaı-aq oǵan ulyna jáne balanyń anasyna jaqyndaýǵa tyıym salyndy.
Bıyl kóktemde Brazılııada jasóspirim mektepte oq jaýdyryp, eki qyzmetker mert bolǵan edi.
