ChatGPT arqyly adamı qarym-qabiletimizdi tómendetip almaımyz ba - senator
ASTANA. KAZINFORM – Búgin elordadaǵy «Áleýmettik vektor: kásibılik, qurmet, tsıfrlyq bolashaq» halyqaralyq forýmynda senator Nurtóre Júsip jasandy ıntellekt aıasyndaǵy ózgeristerge halyqty aldyn ala daıyndaý kerek ekenin aıtty.
- Qazaqstan áleýmettik baǵdarlanǵan memleket bolǵannan keıin, bıýdjet qarajatynyń 60 paıyzdan astamy áleýmettik salaǵa jumsalatyny belgili. Al endi tsıfrlandyrý, sondaı-aq jasandy ıntellekt jaǵdaıynda Qazaqstannyń damýy qalaı bolady? Bul jaǵdaı tek bizdiń elge ǵana qatysty emes, búkil álemdik qaýymdastyqtyń da óte ózekti máselesi. Qazir ártúrli zertteýlerde boljamdar aıtylyp jatyr. Jasandy ıntellekt kirgen jaǵdaıda, álemde eńbek oryndarynda adamdardyń jumysy qysqarýy yqtımal, ıaǵnı mıllıondaǵan adamnyń taǵdyryna áser etýi múmkin, - dedi N. Júsip.
Osy oraıda senator Parlamentte «Jasandy ıntellekt týraly» Zańy egjeı-tegjeıli talqylanyp jatqanyn atap ótti.
- Ómirde baıqasańyzdar, mektep oqýshylary men stýdentter barlyq esse men referatty, ǵylymı zertteýlerdi ChatGPT arqyly oryndaıtyn jaǵdaı boldy. Ary qaraı bir urpaq oılanbaı, barlyǵyn osylaı qurastyra salyp, eńbek etetin jaǵdaıǵa keletin bolsa, onda oılanýdy – adamdyq qarym-qabiletimizdi tómendetip almaımyz ba?! Bul turǵyda jasandy ıntellektiniń zamanyna qaraı amaly deıdi ǵoı, ıaǵnı munyń bári - zamannyń ıgiligi. Biraq ony durys paıdalaný kerek. Osy rette, memlekettik oılastyrylǵan ári tereń zerttelgen bolashaq syn-qaterdi sarapqa sala otyryp, durys sheshim qabyldaý óte mańyzdy. Sondyqtan Parlament tarapynan qabyldanatyn zańdar birinshi kezekti áleýmettik máselelerge, sonyń ishinde halyqtyń áleýmettik jaǵdaıyna ekpin qoıa otyryp maquldanyp jatyr, - dedi depýtat.
Nurtóre Júsiptiń paıymynsha, qazir jasandy ıntellekt aıasynda IT-mamandardy oqytýmen qatar, myńdaǵan muǵalim men eńbek ujymdaryndaǵy tehnologııalardy paıdalanatyn adamdardy tyńǵylyqty daıarlaý kerek.
Buǵan deıin jasandy ıntellekt eshqashan adamnyń ornyn almastyra almaıtynyn jazǵan edik.
Aıta keteıik, búgin elordadaǵy «Áleýmettik vektor: kásibılik, qurmet, tsıfrlyq bolashaq» halyqaralyq forýmynda Premer-mınıstr Oljas Bektenov tsıfrlandyrý áleýmettik eńbek qatynastarynyń barlyq salasyna belsendi túrde engizilip jatqanyn málimdedi.