Chat GPT suranysta, Aitu qaıda: Prezıdent tsıfrlandyrý salasyn qatań synǵa aldy

ASTANA. KAZINFORM – Memleket basshysy Qasym-Jomart Toqaev KazLLM tildik mashınasyn iske qosý men Aitu messendjerin qoldanysqa engizý jumystaryn qatań synǵa aldy.

Búgin Úkimettiń keńeıtilgen otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev atqarylǵan jumystar týraly baıandama jasaǵan edi.

– KazLLM baǵdarlamasy iske qosyldy dep aıttyńyz, biraq meniń bilýimshe bul baǵdarlamaǵa suranys áli tómen. Jurt Chat GPT-ge júginedi, KazLLM-ge kóshkisi kelmeıdi. Sondyqtan KazLLM aınalasynda ne bolyp jatyr degen suraq bar? – dep suraq qoıdy Memleket basshysy Jasandy ıntellekt mınıstrine.

Óz jaýabynda mınıstr elde eki úlken tildik modelder bar ekenin, olar: KazLLM jáne AlemLLM. Olar qazir 40-tan astam júıege engizildi. Qazirgi ýaqytta osy modelder naryqqa, it-kompanııalarǵa, startaptarǵa, stýdentterge, zertteý ınstıtýttaryna qoljetimdi. Biraq osy modelderdiń sapasyn árdaıym jaqsartyp otyrý qajet. Sondyqtan halyqaralyq deńgeıdegi sarapshylarmen birge osy jumys jalǵasady.

– Bul salada olqylyqtar baryn moıyndaısyz ba? – dep naqytaldy Prezıdent.

– Bul modelderdi únemi jańartyp otyrý kerek. Sebebi OpenAI sııaqty iri kompanııalar jańa nusqalar men modelderin shyǵaryp, olardy jetildirip keledi. Sonymen qatar, osy oqytý protsesteriniń úzdiksizdigin qamtamasyz etýimiz kerek, – dep jaýap berdi mınıstr.

Prezıdent: Qazirgi tańda qansha adam KazLLM paıdalanyp otyr?

Mınıstr: Bizdiń málimet boıynsha, osy modelge 600 myńnan astam suranys boldy.

Prezıdent: Mysaly Chat GPT-de Qazaqstan boıynsha qansha adam otyr?

Mınıstr: Qazaqstan boıynsha halyqtyń 13% paıdalanady.

Prezıdent: Mysaly Aitu degen óz messendjerimizdi jasadyq. Onda qansha adam bar?

Mınıstr: Aitu platformasynyń búgingi paıdalanýshylar sany 700 myńnan asyp, bir mıllıonǵa jýyqtady.

– Tsıfrlyq el bolý – aldymyzda turǵan asa aýqymdy mindet. Ásirese bıyl sheshýshi jyl bolmaq. Sondyqtan Úkimettiń osy baǵytta qolǵa alǵan jobalary tsıfrlandyrý isine zor serpin berýge tıis, – dep tapsyrma berdi Prezıdent.

Aıta keteıik, Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onda elimizdiń 2025 jylǵy áleýmettik-ekonomıkalyq damýy qorytyndylanyp, aldaǵy kezeńge arnalǵan negizgi mindetter aıqyndalady.

Aıta keteıik, osy ýaqytta Úkimettiń keńeıtilgen otyrysy ótip jatyr.