Charlz III AQSh-qa 2007 jyldan beri alǵash ret memlekettik saparmen bardy
ASTANA. KAZINFORM – Ulybrıtanııa Koroli Charlz III men patshaıym Kamılla AQSh-qa memlekettik saparmen keldi. Bul – brıtan monarhynyń 2007 jyldan bergi AQSh-qa jasaǵan alǵashqy resmı sapary, dep habarlaıdy BBC agenttigi.
Vashıngtonǵa kelgen koroldik jupty qyzyl kilem ústinde resmı delegatsııa qarsy aldy. Olarǵa gúl shoqtary tabystalyp, Ulybrıtanııanyń AQSh-taǵy elshisi Krıstıan Terner men Aq úıdiń hattama qyzmetiniń basshysy Monıka Kroýlı quttyqtaýyn jetkizdi.
Sapar Aq úı tilshileri qaýymdastyǵynyń keshki asy kezinde bolǵan atys oqıǵasynan keıin qaýipsizdik sharalary kúsheıtilgen kezeńde ótip jatyr.
Soǵan qaramastan, Býkıngem saraıy sapar baǵdarlamasy aıtarlyqtaı ózgermeıtinin málimdedi. AQSh ákimshiligi koroldiń qaýipsizdigi tolyq qamtamasyz etilgenin málimdedi.
Memlekettik sapar London men Vashıngton arasyndaǵy qarym-qatynastaǵy shıelenis aıasynda ótip jatyr. Buǵan deıin AQSh prezıdenti bul sapar eki el arasyndaǵy dıalogty jaqsartýǵa yqpal etýi múmkin ekenin aıtqan.
Koroldik jup AQSh-ta 30 sáýirge deıin bolady. Baǵdarlama aıasynda prezıdenttik juppen jeke shaı ishý, Vashıngtondaǵy Ulybrıtanııa elshisiniń rezıdentsııasyndaǵy qabyldaý jáne Aq úıdegi resmı rásim josparlanǵan.
Seısenbi kúni korol Charlz III AQSh Kongresi aldynda sóz sóıleıdi. Bul brıtan monarhynyń tarıhtaǵy osyndaı ekinshi sózi bolmaq. Buǵan deıin Kongreste alǵash ret 1991 jyly patshaıym Elızaveta II sóz sóılegen.
Sapar Nıý-Iorkte túıindeledi. Onda koroldik jup 11 qyrkúıek tragedııasy qurbandaryn eske alýǵa arnalǵan is-sharalarǵa qatysady.
Buǵan deıin Býkıngem saraıy Charlz III-tiń onkologııalyq dıagnozy týraly habarlaǵan. Em qabyldaýyna baılanysty korol kópshilik is-sharalarǵa sırek qatysqanymen, parlament qabyldaǵan zańdarǵa qol qoıý sekildi konstıtýtsııalyq mindetterin oryndaýdy jalǵastyryp keledi.
Al 2024 jyly III Charlz patsha qazaqstandyqtardy Respýblıka kúnimen quttyqtaǵanyn jazdyq.
