«Chanhtý» taıfýny ońtústikqytaılyq Gýandýn provıntsııasynda eki adamnyń ómirin qıdy
BEIJІŃ. Shildeniń 24-i. QazAqparat /Rýslan Súleımenov/ - Gýandýn provıntsııasynda (Ońtústik Qytaı) «Chanhtý» taıfýnynyń soqqysynan eki adam qazaǵa ushyrady, apat aımaǵynda 1,5 mıllıonǵa jýyq turǵyndar boldy, dep habarlady Gýandýn provıntsııasynyń sý tasqynymen jáne qýańshylyqpen kúres shtaby.
Atalǵan shtabtyń aldyn ala esepterine qaraǵanda, 20 ýez ben qalanyń 1,5 mln. turǵyny apat aımaǵynda qaldy, odan 70 myń adam kóshirildi, 3 myń qurylys nysandary búlindi, zardap shekken aýmaqtaǵy ekonomıkalyq shyǵyn 326 mln. AQSh dollaryna baǵalanýda.
Aımaqta parom men teńiz tasymaly toqtatyldy. Birqatar áýejaılardyń jumysy buzyldy, onyń ishinde týrısterge keńinen tanymal Haınan aralynyń áýejaıy da bar. Daýyl QHR-dyń Gýansı-Chjýan avtonomııalyq aýdanyna qaraı baǵyt aldy.
QHR azamattyq ákimshilik mınıstrligi jáne tabıǵat apatymen kúres basqarmasy budan buryn Gýandýn, Haınan, Gýıchjoý, Hýnan provıntsııalarynda jáne Gýansı-Chjýan avtonomııalyq aýdanynda daýyl turatynyn habarlaǵan bolatyn.
Jergilikti ókimet oryndaryna tabıǵat apaty aýdandarynda saqtyq sharalaryn alý júkteldi, sý tasqyny bolýy múmkin.
