Champions Swim Series: Dmıtrıı Balandın qola medal jeńip aldy
NUR-SULTAN. QazAqparat - Býdapeshte Champions Swim Series-tiń ekinshi kezeńi aıasynda brass ádisimen 200 metrge júzýden jarystar aıaqtaldy. Qazaqstandyq Dmıtrıı Balandın qola medal jeńip aldy, dep habarlaıdy QazAqparat.
QR Ulttyq Olımpıadalyq komıtetinen málim etkendeı, Olımpıada chempıony Balandın dıstantsııany 2:10.73 ýaqytynda eńserdi. Bul kórsetkishpen ol úzdik úshtikti túıindedi. Jarys jeńimpazy reseılik Anton Chýpkov boldy. Onyń nátıjesi - 2:08.23. RF sportshysy atalmysh álemdik týrnırdiń birinshi kezeńinde de úzdik nátıje kórsetken bolatyn.
Dıstantsııany ekinshi bolyp japondyq Ippeı Vatanabe aıaqtady. Ýaqyty - 2:08.61. Aıta keteıik, I.Vatanabe osy qashyqtyqta álemdik rekord ornatqan bolatyn, kórsetkish - 2:06.67.
Eske salaıyq, Champions Swim Series-tiń birinshi kezeńinde D.Balandın tórtinshi orynnan kórindi. Bul nátıje oǵan 2020 jylǵy Olımpıadaǵa joldama alýǵa múmkindik berdi.
Serııanyń sońǵy jarystary AQSh-tyń Indıanapolısinde 31 mamyr-1 maýsym aralyǵynda ótedi.
