Challenger ATP PRESIDENT'S CUP týrnırinde jeńiske jetýge bar kúshimdi salamyn - M. Kýkýshkın
ASTANA. 2 qarasha. QazAqparat /Jasulan Amanbaıuly/ - Elordada júlde qory 125 myń AQSh dollaryn quraıtyn Challenger ATP PRESIDENT'S CUP serııaly halyqaralyq týrnırine Qazaqstan atynan Mıhaıl Kýkýshkın qatysady.
St.Petersburg Open-2010 týrnırinen bas júldemen oralǵan jas tennısshi Astanadaǵy jarystyń jeńisine de dámeli. «Prezıdent kýboginde jeńiske jetken tennısshige 110 upaı beriledi. Bunda jeńiske jetýge bar kúshimdi salamyn. Eger men bas júldeni oljalap, 110 upaıdy alyp jatsam, men úshin ol úlken jetistik. Sebebi men úzdik 50 oıynshynyń qataryna enemin», - dep atap kórsetti ol búgin Astanada ótken baspasóz máslıhatynda.
M. Kýkýshkınniń aıtýynsha, álemdik reıtingtiń alǵashqy elýligine ený maqsatyn ol 2011 jyly baǵyndyrýdy kózdegen eken. «Eger men bul maqsatyma bıyl jetip jatsam, men qatty rıza bolar edim. Sol sebepten Prezıdent kýbogi jolyndaǵy jarysta aıanyp qalmaımyn», - deıdi ol.
Týrnırde M. Kýkýshkınge Raıner Shýtler, Igor Kýnıtsyn, Martın Fısher, Konstantın Kravchýk syndy tennısshiler qarsylas atanady.
M. Kýkýshkınniń aıtýynsha, Challenger ATP PRESIDENT'S CUP serııaly halyqaralyq týrnırinen keıin, ol qarasha aıynyń orta kezinde ótetin Qytaıdaǵy jazǵy Azııa oıyndaryna Qazaqstan atynan qatysýǵa attanady. Sonymen onyń oıyn maýsymy bıylǵa aıaqtalady.
«Dáýlet» ulttyq tennıs ortalyǵynda bastalǵan baıraqty báseke 7 qarashaǵa deıin jalǵasady. Jeke razrıadtaǵy jartylaı fınal men juptyq razrıadtaǵy fınal 6 qarashada, al jeke razrıadtaǵy aqtyq báseke oıyndary 7 qarashada ótedi.
Esterińizge sala keteıik, búgin qazaqstandyq tennısshi Sankt-Peterbordan elordaǵa oraldy. Ol St.Petersburg Open-2010 týrnıriniń fınaldyq oıynynda Reseı sportshysyn 6:3, 7:6 esebimen jeńgen bolatyn. Sankt-Peterborda qol jetkizgen jeńisinen keıin Mıhaıl Kýkýshkın álemdik tennıs dáreje satysynda joǵary kóterildi.
