CGTN: Qazaqstanmen JI jáne jańa medıa baǵytynda seriktestikti damytýǵa múmkindik mol

ASTANA. KAZINFORM — Astanada «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» atty forým aıasynda Qytaıdyń jahandyq televıdenıe jelisiniń (CGTN) prodıýseri Se Mın Kazinform tilshisine bergen suhbatynda sońǵy jyldary Qytaı men Qazaqstannyń jetekshi medıa qurylymdary arasyndaǵy yntymaqtastyq aıtarlyqtaı jandana túskenin atap ótti.

Onyń aıtýynsha, bolashaqta jasandy ıntellekt pen jańa medıa salalaryndaǵy seriktestikti keńeıtýge mol múmkindik bar.

Prodıýser qazirgi tańda CGTN Qazaqstannyń Silk Way telearnasy sııaqty jetekshi medıa uıymdarymen turaqty seriktestik ornatyp otyrǵanyn jetkizdi. Yntymaqtastyq aıasynda jańalyqtar almasý, birlesken derekti fılmder men arnaıy jobalar túsirý, sondaı-aq tilshiler arasyndaǵy tájirıbe almasý syndy baǵyttar qamtylǵan.

Ol bıylǵy joǵary deńgeıdegi sammıt qarsańynda iske qosylǵan «Ortalyq Azııa arqyly úlken saıahat» atty arnaıy jobanyń eki el arasyndaǵy tabysty medıa yntymaqtastyqtyń jarqyn mysaly ekenin atap ótti.

— Biz obektıv arqyly Qytaı men Qazaqstan arasyndaǵy shynaıy ári mazmundy qarym-qatynasty kórsetkimiz keledi. Bul arqyly halyqtar bir-birin tereńirek tanyp, jaqyndaı túsedi dep senemiz, — dedi ol.

Bolashaqqa kóz júgirte otyryp, prodıýser burynnan qalyptasqan birlesken jobalardy jalǵastyra otyryp, zamanaýı tehnologııalar men jańa kontent túrlerin damytý baǵytynda jańa múmkindikterdi zertteýdiń mańyzdy ekenin atap ótti.

— Jasandy ıntellektti qoldaný, jańa platformalardy damytý jáne baǵdarlamalardy ártúrli formatta usyný — bolashaqtaǵy negizgi basym baǵyttardyń biri bolady, — dedi CGTN ókili.

Buǵan deıin Erlan Qarın Memleket basshysy Qasym-Jomart Toqaevtyń forým qatysýshylaryn quttyqtaý hatyn oqyp bergen edi.