Censatsııa jáne favorıtter: Qazaqstan chempıonatynyń úshinshi kúni qalaı ótti
ASTANA. KAZINFORM — Taraz qalasynda bokstan eresekter arasyndaǵy Qazaqstan chempıonatynyń úshinshi jarys kúni aıaqtaldy.
Basty sensatsııa
Jastar arasynda álem chempıony, shilde aıynda ǵana U23 sanatynda Azııa chempıonatynyń fınalısi, 55 kelidegi Beksultan Boranbek (Jambyl obl) úsh raýnd boıy Beksultan Hýjanjardyń (Shymkent q) kiltin taba almady. Esep: 0:5.
60 kelide «Hıjnıak» laqap atymen belgili Asyljan Serikbaı da (Shymkent q) Jetisý oblysynyń jas boksshysy, shilde aıynda U19 sanatynda Azııa chempıonatyna qatysqan Ádilbek Qojahanǵa ese jiberdi. Esep: 0:5
Jeńisti julyp alǵan sportshylar
55 kelige tómendegen Nursultan Altynbek (Qyzylorda obl) jarys qojaıyny Dosymjan Tańatardan jeńisti julyp alyp, sensatsııa tirkeýge múmkindik bermedi.
Jastar arasynda álem chempıonatynyń fınalısi, 60 kelidegi Janseri Kósherbaev (Aqtóbe obl) 2 raýnd boıy tóreshi qaǵazynda artta qalǵanymen, sheshýshi raýndta kambek jasap ketti. Esep: 3:2.
60 kelige tómendegen Jandos Qydyralıev te osy salmaqta júldege úmitker sanalǵan Rýslan Kúzeýbaevtan (Abaı obl) aılasyn asyryp ketti.
Favorıtter
Álem chempıonatynyń fınalısi, 75 kelidegi Ábilhan Amanqul birinshi jekpe-jeginde Nurtileý Alıakbarovty (Almaty q) jeńgenimen, qarsylas laıyqty deńgeıde judyryqtasa bildi.
85 kelide Temirlan Muqataev (Astana q) aıqyn basymdyqpen jeńiske jetse, osy salmaqtaǵy Sultan Aıbaruly (Almaty obl) sheshýshi raýndta Erkebulan Ákimbaıdan (Almaty obl) jeńisti julyp aldy.
Álem chempıony, 60 kelidegi Orazbek Asylqulov (Aqmola obl) pen Talǵat Syrymbetov (Qaraǵandy obl) ázirshe qarsylastarynan bir bas joǵary judyryqtasyp keledi.
Jaraqat
Asa aýyr salmaqta Qaraǵandy oblysynyń ókili Rasýl Asanhanov 2 raýnd boıy bes tóreshiniń qaǵazynda da alda kele jatqanymen, qolynan alǵan jaraqatyna baılanysty jekpe-jekti merziminen buryn aıaqtaýǵa májbúr boldy.
Aıta keteıik, Qazaqstan chempıonaty 6 qarashaǵa deıin jalǵasady.
Bokstan Qazaqstan chempıonatynyń alǵashqy kúni qalaı ótkenin jazǵan bolatynbyz.
