Cenatorlar Jırınovskııdi Qazaqstanǵa kirgizbeýdi suraıdy
ASTANA. QazAqparat - Búgin Parlament Senatynyń jalpy otyrysynda elimizdiń bir top senatorlary Úkimet basshysyna saýal joldap, onda reseılik saıasatker Vladımır Jırınovskııdi Qazaqstanǵa kirgizbeýdi jáne elimizdiń aqparattyq keńistigin arandatqysh málimdemelerden qorǵaýdy surady.
Saýaldy otyrys barysynda senator Orynbaı Rahmanberdıev jarııalaǵan bolatyn.
Depýtattyń aıtýynsha, Reseı Memlekettik Dýmasynyń depýtaty Vladımır Jırınovskııdiń 23 aqpandaǵy sózi qazaqstandyq qoǵamda asa jaǵymsyz reaktsııa týdyrdy.
«Onyń «Ortalyqazııalyq federaldyq okrýg» týraly sózin Qazaqstan men basqa da Ortalyq Azııadaǵy memleketterdiń egemendigine, táýelsizdigine, onyń aýmaqtyq tutastyǵyna qol suǵýshylyq dep túsinýge bolady. Memlekettik Dýma tóraǵasy orynbasarynyń, parlamenttik partııa basshysynyń, belgili saıasatkerdiń mundaı málimdemeleri Qazaqstan men Reseı arasyndaǵy strategııalyq sıpattaǵy yntymaqtastyqtaǵyna qaıshy kelip qana qoımaıdy, bul - halyqaralyq quqyqqa negiz qalaıtyn normalar men prıntsıpterge múldem kereǵar. Al mundaı áńgimeniń Qazaqstan aýmaǵyna da taralatyn «Reseı-24» telearnasynan jarııalanýy jurtshylyqty alańdatyp otyr. Sondyqtan da, bizdiń jurtshylyq telearnanyń pozıtsııasyn Reseı tarapynyń resmı ustanymy retinde qabyldaýy da ábden múmkin», - dedi Orynbaı Rahmanberdıev.
Senatordyń aıtýynsha, Qazaqstanǵa qatysty birneshe márte málimdeme jasaǵan Jırınovskııdiń sózderi eki kórshiles memlekettiń strategııalyq yntymaqtastyǵyna syzat túsirip qana qoımaı, Reseıdiń óziniń halyqaralyq pozıtsııasyna da selkeý túsiredi. «Al mundaı málimdemelerdiń qaıtalanýy Eýrazııalyq keńistiktegi ıntegratsııalyq progreske de jaǵymsyz qoǵamdyq pikir qalyptastyrady», - dedi Orynbaı Rahmanberdıev. Saýalǵa birqatar palata depýtattary qoldap, qol qoıǵan.
