Cenatorlar Qostanaıda kóshpeli otyrys ótkizdi
QOSTANAI. QazAqparat - Qostanaı oblysyna jumys saparymen kelgen QR Parlamenti Senatynyń depýtattary óndiris oshaqtaryn aralap, aımaqtyń damý josparymen tanysty, dep habarlaıdy QazAqparat tilshisi.
Agrarlyq máseleler, tabıǵatty paıdalaný jáne aýyldyq aýmaqtardy damytý komıteti aýyl sharýashylyǵy nysandaryn sýbsıdııalaý máseleleri boıynsha kóshpeli otyrys ótkizdi. Sharaǵa senatorlar Ańsar Musahanov, Bekmyrza Elamanov, Muhtar Jumaǵazıev, Dúısenǵazy Mýsın, Ábdáli Nuralıev qatysty.
«Memleket basshysy «Qazaqstannyń úshinshi jańǵyrýy: jahandyq básekege qabilettilik» Joldaýynda agrarlyq sektordy ekonomıkanyń jańa draıverine aınaldyrý qajettigin aıtty. Al qazirgi kezde aýyl sharýashylyǵy ónimderin óndirýshilerdiń kópshiligi salyq salý, sýbsıdııalaý jónindegi jańadan engizilgen erejelerdi bile bermeıdi. Sodan soń memlekettiń aýyl sharýashylyǵy salasynda qabyldaǵan sheshimderine baılanysty suraqtar týyndap jatady. Bul salalyq mınıstrliktiń jergilikti bılik organdaryndaǵy zańnamany túsindirý jónindegi qalyptasqan jumystardyń joqtyǵyn kórsetedi. Aldaǵy ýaqytta birlese jumys atqaratyn sharýamyzdyń biri osy bolmaq», - dedi komıtet tóraǵasy Jeńis Nurǵalıev.
Senat depýtattary eńbekkerlerdiń máselelerin tyńdady. Aýyl sharýashylyǵy kooperatıvteriniń ókilderi sýbsıdııalaý men salyq salý boıynsha týyndaǵan máselelerdi kórsetip otyrdy.
«Aýyl sharýashylyǵy organdarymen qatar, salyq organdary da aýqymdy túsindirý jumystaryn júrgizýi kerek. Ortaq jumys arqyly ǵana jaqsy nátıjelerge qol jetkizemiz»,- dep atap ótti J.Nurǵalıev.
Qostanaı oblysy ákiminiń orynbasary Ǵaýez Nurmuhambetov óz baıandamasynda aýyl sharýashylyǵynda sońǵy jyldary bolǵan ózgerister týraly aıtty.
«Osy eki-úsh jyldyń kórsetkishterin alyp qarasaq, agroónerkásiptik keshende aıtarlyqtar ilgerileýshilikter bar, iri ınvestıtsııalyq jobalar júzege asyryldy. Tehnıkalyq qaıta jaraqtandyrý, kásiporyndarǵa ınnovatsııalyq tehnologııalardy engizý sııaqty máseleler sheshimin tapty. Ótken jylmen salystyrǵanda ınvestıtsııalyq salymdar 20%-ǵa ósti. Negizgi kapıtal 42 mlrd teńgeni qurady. Bıyl bıdaı alqaptary 106 myń gektarǵa qysqaryp, jem-shóp qoryn áldeqaıda ulǵaıtýǵa múmkindik berildi», - dedi Ǵaýez Nurmuhambetov.
Senat komıtetiniń tóraǵasy J. Nurǵalıev basqosýda aıtylǵan ózekti máseleler men usynystar Parlamenttiń jáne aýyl sharýashylyǵy mınıstrliginiń jumysynda talqylanatynyna senim bildirdi.
Depýtattar Rýdnyı qalasyndaǵy «Jas qanat - 2006» JShS qus fabrıkasynyń jumysymen tanysty. Munan soń «Sokolov-Sarybaı ken baıytý óndiris birlestigi» AQ, «SaryarqaAvtoProm» AQ qyzmetkerlerimen kezdesti. 1997 jyldan bastap Qazaqstan men Reseı naryǵynda joǵarǵy jetkistikterge jetip júrgen «Mılh» JShS jumysyna halyq qalaýlylary tarapynan joǵary baǵa berildi.
«Bizdiń seriktestik sún ónimderin shyǵarý jáne sútti qaıta óńdeý qyzmetimen aınalysady. Óndiris qýattylyǵy 30 myń tonnaǵa deıin jetedi. Qazirgi kezde 241 adam jumys isteıdi», - dedi «Mılh» JShS dırektory Sergeı Blok.
Parlamentshiler A. Baıtursynov atyndaǵy Qostanaı memlekettik ýnıversıtetiniń professor-oqytýshylar quramy jáne stýdentterimen kezdesý barysynda ǵylymı jetistikter men ınnovatsııalyq jobalardy aýyl sharýashylyǵy salasyna engizý máselelerin qarastyrdy.
