Cenatorlar Qazaqstandaǵy gaz salasyn damytý jáne óńirlerdi gazdandyrý máselesin talqylady
ASTANA. Maýsymnyń 4-i. QazAqparat /Qanat Mámetqazyuly/ - Búgin QR Parlamenti Senatynda Úkimet saǵaty ótip, onda elimizdegi gaz salasyn damytý jáne óńirlerdi gazdandyrý máselesi talqyǵa tústi,
dep habarlaıdy QazAqparat.
«Búgingi kúni elimizdiń munaıgaz salasynda túbegeıli qurylymdyq qaıta qurýlar júzege asyp, bul baǵyttaǵy basqarý júıesinde reformalar júrgizildi. Úkimet pen jergilikti atqarýshy organdar 2015 jylǵa deıingi gaz salasyn damytý tujyrymdamasyna sáıkes eldi mekenderdi gazdandyrý aıasynda birshama jumystar atqaryldy. Degenmen de, Gaz salasyn damytý baǵdarlamasyn júzege asyrý, onyń ishinde eldi mekenderdi gazdandyrý sharasy sátsizdikke ushyrap otyr. Jalpylama alyp qarasaq, buǵan tańdanarlyq eshteńe de joq, óıtkeni bul úderis jergilikti sıpat alyp, onda Qazaqstannyń soltústik óńirleriniń múddeleri qorǵalmaǵan edi. Sonymen birge, bul baǵytta baǵdarlamany júzege asyrýdyń zamanaýı, burynǵydan tıimdirek ádisteri qamtylmady. Onyń ústine baǵdarlama tek qana memleket qarajaty esebinen júzege asty», dedi jıyn barysynda senator Edilbaı Imanqulov.
Onyń aıtýynsha, búgingi basqosýda talqyǵa túsken másele el azamattarynyń ómir sapasyn jaqsartý turǵysynan asa mańyzdy bolyp tabylady. Osyǵan oraı, senatorlar jıyn barysynda birqatar salmaqty usynystardy ázirleýdi kózdep otyr.
