Cenator E. Imanqulov elimizde arnaıy gaz ınspektsııasyn qurýdy usynady
ASTANA. Maýsymnyń 4-i. QazAqparat /Qanat Mámetqazyuly/ - Búgin QR Parlamenti Senatynda elimizdegi gaz salasyn damytý jáne óńirlerdi gazdandyrý máselesine arnalǵan Úkimet saǵaty barysynda senator Edilbaı Imanqulov elimizde arnaıy gaz ınspektsııasyn qurýdy usyndy,
dep habarlaıdy QazAqparat.
«Búgingi tańda elimizde gaz salasyn udaıy qadaǵap turatyn ınspektsııa jumys istemeıdi. Bundaı ınspektsııa turǵyn úılerdegi, gaz sharýashylyǵyndaǵy apatty jaǵdaılardyń aldyn alýǵa aıtarlyqtaı járdem beretin edi. Sondyqtan da, elimizde arnaıy gaz ınspektsııasyn qurýdyń mańyzy zor dep bilemin», dedi E. Imanqulov.
Sonymen birge, senator Memleket basshysynyń munaı ilespe gazdaryn ulttyq menshikke alý týraly tapsyrmasyn júzege asyrý jaıyna toqtala kele, bul rette ilespe gazdardy paıdalaný máselelerin zertteý jóninde arnaıy jumys tobyn qurý qajettigin alǵa tartty. «Munaı ilespe gazdaryn joıý jáne qaıta óńdeýge barysynda kóptegen problemalar týyndaıtyny aıqyn. Al ekonomıkalyq turǵydan alǵanda, bizdiń elimiz úshin óńdelgen ilespe gazdy alýdyń paıdasy mol bolary anyq», dedi depýtat.
