Cenat komıteti memlekettik qyzmet máselelerine arnalǵan zań jobasyn talqylady
ASTANA. 26 qarasha. QazAqparat - Búgin QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasy talqyǵa tústi.
Eske salsaq, Májilis maquldaǵan atalǵan zań jobasy memlekettik qyzmetke kirýdiń tıimdi ári aıqyn tetikterin, baǵalaý jáne mansaptyq josparlaý júıesin engizý, basqarýshylyq korpýsyn qurý sekildi máselelerdi qamtıdy. Sondaı-aq, qujat kadr qyzmetteriniń rólin arttyryp, memlekettik qyzmetshilerdi kótermeleý men yntalandyrý sharalaryn, qyzmet etıkasyn jáne sybaılas jemqorlyqqa qarsy sharalardy jetildirý arqyly memlekettik apparattyń kásibıligi men tıimdiligin arttyrýǵa baǵyttalady.
Sonymen birge zań jobasynda memlekettik organdardyń jumysynda sabaqtastyqty qamtamasyz etý jáne jańa qyzmetkerlerdiń beıimdelýi úshin tálimdilik ınstıtýtyn engizý normalary da qamtylǵan. Budan bólek oblystarda, qalalar men aýdandarda biryńǵaı kadr qyzmetterin konkýrstyq attestattaý jáne tártiptik komıssııalardy qurý usynylady. Memlekettik qyzmetshilerdiń qyzmet etıkasyn saqtaýy boıynsha jáne sybaılas jemqorlyqqa qarsy is-áreketteri jónindegi mindetterin kózdeý belgilenedi. Sybaılas jemqorlyqtyń aldyn alý maqsatynda «komandalyq kóshýge» barynsha tosqaýyl qoıý tetikteri qamtylyp otyr.
Zań jobasynyń negizgi basymdyqtaryna keletin bolsaq, onda kadrlardy irikteý men joǵarylatý kezinde merıtokratııa qaǵıdatyn kúsheıtý, «A» basqarýshylyq korpýsyn qurý, personaldy basqarý ınstıtýttary men mehanızmderin jetildirý, kadr qyzmetiniń rólin arttyrý, sondaı-aq tártiptik jáne etıkalyq baqylaýdy kúsheıtý normalary engizilip otyr. Bul maqsatta zań jobasymen konkýrstyq irikteýge baılanyssyz, irikteýdiń derbes kezeńi retinde testileýden ótkizý qarastyrylǵan. Bul memlekettik organdardyń konkýrstyq rásimderin ótkizý ýaqytyn neǵurlym qysqartýǵa (50-60 kúnnen 15-20 kúnge) múmkindik beredi.
Budan bólek, alǵashqy ret zań jobasynda memlekettik qyzmetshilerdiń Ar-namys Kodeksin jáne jemqorlyqqa qarsy normalardy qosatyn qyzmettik etıka jóninde bólek taraý engizilgen.
Zań jobasy aldaǵy ýaqytta palatanyń jalpy otyrysynda talqyǵa túspek.
