Cenat komıteti arnaýly memlekettik organdar týraly zań jobasyn talqylady
ASTANA. 10 qańtar. QazAqparat /Qanat Mámetqazyuly/ - Búgin QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy barysynda senatorlar «Qazaqstan Respýblıkasynyń arnaýly memlekettik organdary týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń arnaýly memlekettik organdary týraly máseleleri boıynsha ózgerister men tolyqtyrýlar engizý týraly» zań jobasyn talqylady.
«Qazirgi tańda bizdiń elimizde memlekettik qyzmettiń birqatar túrleri zańnamalyq turǵydan rettelip otyr jáne olarǵa dıplomatııalyq, áskerı jáne quqyq qorǵaý qyzmetterin jatqyzýǵa bolady. Osy rette toqtala ketetin jaıt, elimizdiń arnaýly organdarynyń óziniń erekshelikteri barshylyq. Al olardyń qyzmetiniń zańnamalyq tártippen naqty túrde rettelmeýi memleket úshin belgili bir qıyndyqtardy týyndatatyny da ras. Sondyqtan da, usynylyp otyrǵan zań jobalarymen eki mańyzdy máseleni sheshý qarastyrylady. Birinshiden, demokratııalyq úderisterdiń damýy jaǵdaıynda olar memleket demılıtarızatsııasy úshin erekshe jaǵdaılar qalyptastyrady», - deıdi zań jobasyn tanystyrǵan QR Ulttyq qaýipsizdik komıteti tóraǵasynyń orynbasary Ǵusman Ámirın.
Onyń aıtýynsha, zań jobalaryn qabyldaý arnaýly memlekettik organdarǵa, atap aıtqanda UQK-ǵa, «Syrbar» Syrtqy baqylaý qyzmetine jáne Prezıdenttiń kúzet qyzmetine bólingen resýrstardy tikeleı mindetterdi sheshý úshin shoǵyrlandyrýǵa múmkindik beretin bolady. Budan bólek, qujat arqyly olardyń jumys isteý erekshelikterine qaraı arnaıy memlekettik organ qyzmetkerleriniń áleýmettik qorǵalýyn qamtamasyz etý máselelerin de qamtý kózdelip otyr.
Atalǵan zań jobalary palatanyń aldaǵy jalpy otyrysyna shyǵarylatyn bolady.
