Cemeıde zeınetkerdi alaıaq 1 mln teńgege shyǵynǵa batyrdy
SEMEI. QazAqparat – Semeı qalasynda 73 jastaǵy zeınetkerdi qundyz ton satamyn dep aldaǵan alaıaq ustaldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, qarttyń úıine kelgen beıtanys áıel qundyz tondy 950 myń teńgege satatyndyǵyn aıtqan. Oıyna esh sekem kelmegen zeınetker oǵan suraǵan aqshasyn bere salady. Alaıda arada biraz ýaqyt ótse de tapsyrysyn ala almaǵan. Al jymysqy oıyn iske asyrǵan alaıaq telefonǵa jaýap berýin qoıdy. Sol kezde tuzaqqa túsip qalǵanyn túsingen keıýana quqyq qorǵaý organdaryna habarlasyp, aryz jazǵan.
«Jedel-izdestirý sharalary barysynda polıtsııa qyzmetkerleri kúdiktini qolǵa túsirdi. 34 jastaǵy jumyssyz áıel óz kinásin moıyndap otyr. Ol aqshany jumsap úlgergen», - dep habarlady vedomstvo ókilderi.
Qazirgi ýaqytta tártip saqshylary QR QK-niń 190-baby 1-bóligimen (Alaıaqtyq) sotqa deıingi tergeý amaldaryn júrgizýde.
