Cemeıde 300-ge jýyq turmysy tómen otbasynyń úıine ýly gazdy anyqtaıtyn datchık ornatyldy

SEMEI. QazAqparat – Semeı qalasynda jylytý maýsymy bastalǵaly beri 300-ge jýyq turmysy tómen otbasynyń úıine ýly gazdy anyqtaıtyn datchık ornatyldy, dep habarlaıdy QazAqparat tilshisi.

Oblystyq Tótenshe jaǵdaılar departamenti baspasóz qyzmetiniń málimetine súıensek, jer úıde pesh jaǵyp otyrǵan halyqtyń kómirtegi totyǵymen ýlanýynyń aldyn alý úshin birqatar shara atqarylýda.

«Osyndaı jazataıym oqıǵalar pesh paıdalaný kezinde qaýipsizdik erejelerin saqtamaý saldarynan bolyp jatady. Demeýshilerdiń qarajaty esebinen Semeıdegi áleýmettik osal sanattaǵy otbasylardyń úılerine ýly gazdy anyqtaıtyn datchıkter ornatylýda. Jylytý maýsymy bastalǵaly beri 300-ge jýyq datchık ornatylǵan», - delingen aqparatta.

2019-2021 jyldary aralyǵynda qala boıynsha osyndaı 467 datchık ornatylǵan.

«Bıylǵy jylytý maýsymynda Semeıde kómirtegi totyǵynan 27 adam zardap shekken. Qalalyq TJD turmysy tómen 843 otbasyn esepke aldy. Osy baǵyttaǵy jumys úzdiksiz jalǵasady», - delingen habarlamada.