Cemeıde 142 jyl buryn salynǵan ǵımarat túnnen beri órtenip jatyr
ÓSKEMEN. QazAqparat – Cemeılik órt sóndirýshiler 1879 jylǵy ǵımaratta shyqqan jalynmen 10 saǵat boıy arpalysýda, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 26 aqpanda saǵat 00.46-da Abaı dańǵylynyń boıynda ornalasqan JShS-nyń ekiqabatty ǵımaratynda órt shyqqan. Órt sóndirýshiler oqıǵa ornyna birden kelip jetti. Aǵashtan salynǵan 1879 jylǵy ǵımarattyń qabyrǵalaryn, edenin, jıhazdardy jáne jeke zattardy jalyn sharpyǵan.
«Qazirgi ýaqytta tilsiz jaýmen 19 tehnıka men 55 adam kúresýde. Aldyn ala málimet boıynsha, jalyn 600 sharshy metr aýmaqty sharpydy», - delingen habarlamada.
Órttiń shyǵýyna – elektr jabdyqtaryn montajdaý jáne paıdalaný kezinde qaýipsizdik talaptaryn saqtamaý, elektr jabdyqtarynyń apattyq jaǵdaıda bolýy nemese otpen abaısyz áreket etý sebep bolýy múmkin.
