«Cemeı-Qaınar» tasjolynda eki kólik soqtyǵysyp, 2 adam kóz jumdy
ÓSKEMEN. QazAqparat – Shyǵys Qazaqstan oblysyndaǵy «Cemeı-Qaınar» tasjolynda eki kólik betpe-bet soqtyǵysyp, 2 adam kóz jumdy, taǵy úsheýi jaraqat aldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy búgin tańerteń «Semeı-Qaınar» avtojolynyń 378-shi shaqyrymynda boldy. Volkswagen jáne Daewoo markaly kólikter betpe-bet soqtyǵysqan.
«Sonyń saldarynan Daewoo kóliginiń 30 jastaǵy júrgizýshisi men 63 jastaǵy jolaýshysy sol jerde jan tásilim etti. Sondaı-aq sol kóliktegi 2003 jáne 2004 jyly týǵan eki jolaýshy men Volkswagen kóligindegi 49 jastaǵy júrgizýshi dene jaraqattarymen aýrýhanaǵa jetkizildi», - delingen aqparatta.
Atalǵan fakti boıynsha QR Qylmystyq Kodeksiniń 345-babyna sáıkes sotqa deıingi tergeý amaldary bastaldy. Qazirgi ýaqytta oqıǵanyń barlyq mán-jaıy anyqtalýda. Birqatar sot saraptamalary taǵaıyndalyp, sonyń nátıjeleri boıynsha protsessýaldyq sheshim qabyldanady.
