Tsement zaýyttarynyń áreketinde baǵany kelise otyryp kóterý faktisi anyqtaldy
ASTANA. QazAqparat - Qazaqstandaǵy tsement zaýyttary ónimderiniń baǵasyn kelise otyryp kótergen. Bul týraly búgin Astanada QR Básekelestikti qorǵaý agenttiginiń ótken jyldaǵy qorytyndysy men bıylǵy maqsattaryna arnalǵan keńeıtilgen alqa májilisinde osy vedomstvonyń basshysy Ǵalym Orazbaqov málim etti.
«Shymkent Tsement» AQ pen «Standart tsement» JShS-nyń, «Central Asia Cement» AQ-nyń, «Buqtyrma tsement kompanııasy» AQ men «Semeı tsement zaýyty» JShS-nyń áreketterinde tsement baǵasyn kelise otyryp kóterý bóliginde básekelestikke qarsy kelisilgen is-qımyldar retinde tanyldy», - dedi Ǵ. Orazbaqov. Osy oraıda ol aıyppuldyń jalpy somasy 372 mln. teńgeni quraǵanyn atap ótti. Búginde 2 naryq sýbektisi ákimshilik jaýapkershilikke tartylyp, bıýdjetke 1,6 mln. teńge kóleminde aıyppul tóledi.
