Tsement ımportyna ruqsat berilýi múmkin

NUR-SULTAN. QazAqparat – Tsement baǵasy túspese, ımportqa ruqsat berilýi múmkin, dep habarlaıdy QazAqparat tilshisi.

Bul týraly halyq aldyndaǵy eseptik kezdesýinnen keıin BAQ ókilderiniń saýalyna jaýap bergen Indýstrııa jáne ınfraqurylymdyq damý mınıstri Beıbit Atamqulov aıtty.

«Elimizde 12 tsement óndirýshi bar. Jyl saıyn 15 mln tonna tsement óndiredi. Al tutyný kólemi – 9,5 mln tonnanyń mańaıynda. Óndirýshi baǵany ary ketse 5 paıyz ǵana kótergen. Qalǵan ósimniń bári alyp satqyshtar men saýda kompanııalarynyń tarapynan bolǵanyn kórip otyrmyz. Biz óz kezegimizde Báskelestikti qorǵaý jáne damytý agenttigine júgindik. Olar naryqtaǵy baǵany tekseredi. Qazir solarmen birge taldaý jasap jatyrmyz. Sonyń qorytyndysy boıynsha ákimshilik sharalar qabyldanady», - dedi Beıbit Atamqulov.

Mınıstr baǵany yryqqa kóndirý úshin retteý tetikteri iske qosylatynyn eskertti.

«Eger agenttiktiń tekserýi kezinde baǵany qoldan ósirý anyqtalsa, mınıstrlik tsement ımportyna ruqsat engizedi. Osylaısha ishki naryqta tsementtiń usynysy kóbeıedi. Bul avtomatty túrde betonnyń qunyna, qurǵaq qospalardyń qunyna áser etedi. Osylaısha ımporttyq ınterventsııa esebinen baǵany túsire alamyz. Biz qabyldaı alatyn aqtyq shara osy bolady. Al aldyn ala kelisip alý, sybaılastyq týraly aıtsaq, Básekelestikti qorǵaý jáne damytý agenttiginiń tekserýi bárin anyqtaıdy. Ol týraly qosymsha habarlaımyz», - dedi vedomstvo basshysy.