Tselınogradtan Astanaǵa deıingi kezeń jańa serıal sıýjetine arqaý boldy
Kınostýdııanyń baspasóz qyzmeti taratqan aqparatqa sáıkes, elordanyń mereıtoıyna arnalyp túsiriletin tórt serıaldy kórkem týyndy Reseıdiń «Pervyı kanal» telearnasynan kórsetiletin bolady. Serıaldyń rejısserleri - Ivan Glýbokov (Reseı) jáne Oljas Ermekbaev (Qazaqstan). Atalǵan fılm mıstıka jáne fantastıka elementteri bar melodrama janrynda túsiriledi.
«Serıaldyń negizgi oqıǵasy 60-shy jyldardaǵy Tselınograd qalasynda jáne arman qala retinde kórsetiletin qazirgi Astana qalasynda órbıdi. Elordamyz fılmniń basty dekoratsııasy retinde paıdalanylyp qana qoımaı, sonymen qatar, astanalyqtarmen birge kartınanyń basty keıipkeri bolmaq. Fılmniń epızodtyq rólderine kastıng jarııaladyq, sondyqtan da serıalǵa túskisi kelgen azamattarǵa qulaqqaǵys etemiz», - dedi serıaldyń rejısseri Oljas Ermekbaev.
Rejısserdiń aıtýyna qaraǵanda, kastıngke jasy 5 pen 70 jas aralyǵynda barlyq qazaqstandyqtar qatysa alady (er adamdar, áıelder jáne balalar).
«Mahabbat. Úmit. Astana» serıalynyń tusaýkeseri 2018 jyldyń 6 shildesine - Astana qalasy kúnine josparlanǵan.
Esterińizge sala ketsek, byltyr 19 jeltoqsanda Máskeýde QR Mádenıet jáne sport mınıstri Arystanbek Muhamedıuly men «Pervyı kanal» AQ bas dırektory Konstantın Ernsttiń kezdesýi barysynda, eki el arasyndaǵy kıno ındýstrııasyn jáne televızııa salasyn damytý boıynsha yntymaqtastyq jónindegi kelisim jasalyp, birlesken kınojoba túsirý týraly kelisimge kelgen bolatyn.
