Tsarnaevtyń dosy lańkestik áreketti tergeýge kedergi jasaǵany úshin 2,5 jylǵa sottalady
ASTANA. QazAqparat - AQSh bılik kózderiniń málimetteri boıynsha, Bostondaǵy lańkestik áreketiniń tergeý amaldaryn júrgizgen quqyq qorǵaý organdarynyń qyzmetkerlerine jalǵan aqparat bergen Qyrǵyzstan azamaty Haırýllojon Matanov beısenbi, 18 maýsym kúni 2,5 jylǵa sottalady.
Sot úkimi Boston sotynda jarııalanady. Bıylǵy jyldyń naýryz aıynda Matanov tergeýshilerge jalǵan aqparat bergenin, sondaı-aq óz noýtbýgynyń qatty dıskisinen iske qatysy bolýy múmkin kompıýterlik faıldardy joıyp tastaǵanyn moıyndady.
BAQ habarlaǵandaı, jas azamat aıyptaý tarapynyń ol úshin jeńil jazany suraýǵa kelisken talaptaryna osylaısha kóngen. Basqa jaǵdaıda oǵan 20 jylǵa deıin bas bostandyǵynan aıyrý jazasy berilýi múmkin bolǵan.
Prokýratýranyń aqparatynsha, Kýınsı qalasynda (Massachýsets shtaty) turyp, onda taksı júrgizýshisi bolyp jumys istegen Matanov Tamerlan men Djohar Tsarnaevtardyń dosy bolǵan. Ol Boston marafonyndaǵy jarylystardan keıin kóp uzamaı polıtsııaǵa baryp, aǵaıyndylardy tanyǵanyn aıtty, dep jazady TASS.
Bul rette, prokýratýranyń sendirýinshe, quqyq qorǵaý organdarynyń qyzmetkerlerimen áńgimelesýde jas azamat Tsarnaevtarmen etene jaqyndyǵyn jasyrdy. Atap aıtqanda, ol Bostondaǵy jarylystarǵa deıin birneshe saǵat buryn aǵaıyndylarmen túski tamaq ishkenin aıtpady. Osyǵan baılanysty 2014 jyldyń mamyr aıynda Matanov qamaýǵa alyndy. Bastapqyda ol óziniń kináli emestigin aıtty.
Eske sala keteıik, 2013 jyldyń 15 sáýirinde Boston qalasynyń ortalyǵynda marafonnyń máre syzyǵyna jaqyn jerde arada 12 sekýnd salyp qatarynan eki jarylys boldy. Sonyń saldarynan úsh adam qaza taýyp, 260-tan astamy jaraqattar aldy. Amerıkanyń bılik kózderi bul jarylystardy aǵaıyndy Tsarnaevtar uıymdastyryp, oryndady degen qorytyndy jasady. Lańkestik áreketten keıin birneshe kún ótken soń aǵaıyndylardyń úlkeni - Tamerlan polıtseılermen bolǵan atys kezinde óltirildi, al kishisi Djohar jaralanyp, qamaýǵa alyndy.
